ހިނިތުންވެގެން ހުރެ ކަރުނަތައް ދިރުވާލުމީ އިހުސާނެކޭ
މިނިވަން ހިނގާ ޠާހިރު ލެއިން ހިތުގައި ވަނީ އީމާނެކޭ
ފިނިރޯޅިއާ ހަރަކާތް ވެލާ ގަސްތަކުގެ ފަތްތައް ފެހި އެހާ
ފިނިފެންމަލުން ވަސްމީރުވީ މިފުރާނައީ ބުސްތާނެކޭ
ކޫރުންތަކެއް ހިތުގާ އެޅުނު ނޫރަންކުލައިން ކުލަތައް ފެވުނު
ރޫހީއުފާ ދައުރަށް ލިބުނު ގެނުވީ ނިމުން އުދުވާނެކޭ
ހިއްލާލި ރާޅުގެ ހުޅިމަތީ ކިއްލާ ބިނާވާ ގޮތްމަތީ
ދިއްލާލި ނޫރުގެ އަލި އެއީ ބިއްލޫރި ފަދަ އަރުމާނެކޭ
ޖެހެމުން އެއައި މަޑު ރޯޅިފަށް އުތުރުން ބަދަލު ދެކުނަށް ވެފާ
ބެހުމަށް ދަތުރު މެދުވެރި އެވީ މޫސުމުގެ އައި ޠޫފާނެކޭ
ތޯތޯ ނުވާނެ ފިދާއަކުން އަގުދޭން ހަޔާތަށް އަމުދަކުން
ލޯބީގެ ހައްގަށް ހެޔޮހިތުން ދެން ލާޒިމީ ގުރުބާނެކޭ
ކިޔެމުން މިދާ ފަތްފުށްތަކުން ލިބެމުން މިދާ އިބުރަތްތަކުން
ލިޔެލަން އޮތީ ރަންދެއްޔަކުން ކެތްތެރި ނިކަން ދާސްތާނެކޭ
ފިރުމުންތަކުން އަނިޔާ ލިބޭ ކަރުނުން ދަވާ ދަރުދަށް ލިބޭ
ދިރިއުޅުމަކީ ހެން ދިރިއުޅޭ ބިރުވެރި ހިތުގެ ހައިޖާނެކޭ
ވިރެމުން ލަގޮނޑި މި ހިތާ މެޔާ ގިރެމުން ނަފުސު ކަށްޓާ ލެޔާ
ކިރިކިރި މިހެން ދެބަ ހާލުގާ ދިރިހުރި މިވެސް އިންސާނެކޭ