އިބުރަތާ އެތަކެއް ފިލާވަޅު ދުނިޔެ އަށް ލިބިދީފިޔޭ
ލިބުނު ފުރުސަތު ސައްތައިން ޤަޠަރުން ޔަގީން ކޮށްދީފިޔޭ
މުޅި ފަޒާ ގުގުމާލަމުން ދުނިޔޭގެ ހުރިހާ ކަންކޮޅުން
ކުޅިވަރުގެ އައި އީދަކަށް ވާދައިގެ ކުރިމަތި ލައިފިޔޭ
މޮޅުނަމާ އެކު ދެރަވެގެން އަދި ދެރަނަމާ އެކު މޮޅުވެގެން
މޮޅުވުމާ ދެރަވުމުގެ ރަހަތައް ތަޖުރިބާ ކޮށްދީފިޔޭ
ކުޅިވަރާ ނުގުޅޭ ޚިޔާލާ ވިސްނުމުގެ އުނދަގޫތަކުން
ކުޅިވަރަށް ކުރުވާ އަސަރު ހިތި މޭރުމަށް ގެނުވައިފިޔޭ
އުފަލުގައި ހައްދެއް ނެތިވެ އަނެކުންގެ ހުރުމަތް ކެނޑުމުގައި
ނަފުރަތާއި މަލާމަތާ ލިބިދާނެކަން ބުނެދީފިޔޭ
ވާދަޔާ އެކުވެރިކަމާ ކުޅިވަރުގެ ރޫހާ ވާޖިބާ
ހާދަހާ ފުރިހަމަ މިސާލެއް ސާބަހަށް ތަން ދީފިޔޭ
އިގުތިސާދީ ފޯރުމާ އޮތް އިޢުތިޤާދީ ރޫހުގައި
އިޖުތިމާއީ ބަދަހިކަން ދަރުސެއް އެތައް ލިބިދީފިޔޭ
އަސްލު އިންސާނީ ޠަބީޢަތް ސުލްހަވާ މަތިވެރި އުސޫލު
މަސްރަހުން ސީދާ ލޮލަށް ފެނި އަސަރުތައް ކުރުވައިފިޔޭ
ހަސަދަވެރި ހިތތްތަކުގެ ވޭނީ ޒަޚަމުތައް ދިލަ ގަދަވެގޮސް
އަސަރަކުން ހިތި މަސަލަހެއް ނެތި ފާރުތައް ފުން ކޮށްފިޔޭ
ދެކޮޅުވެރި ދޫތަކުގެ ވިހައިން ބޭރުކުރިހާ ޒަހަރުތައް
އެކޮޅުކޮލު ކޮށްލި ޝިފާއަކުން އާރޫހުތައް ދިރުވައިފިޔޭ
ފޮނިކަމާ ހިތިކަމުގެ ނޭވާ ނުފެތި ހަށްޓަށް ދިޔަފަހުން
މުނިއަވަސް ފިލުވާލަދިން އީދަށް ނިމުން ގެނުވައިފިޔޭ
ވޯލްޑްކަޕް އުފުލާލުމަށް ހުއްޓުނު މެސީ ޖާޒީމަތިން
ލޯބިވެތި އަޅުވާލި ބިޝްތުގެ މާނަ މާ ފުންކޮށްފިޔޭ
އޭގެ ރަމްޒީ ސިއްރުތައް ތަޙުލީލު ކުރެވޭ ވިސްނުމުން
އޭގެ އަގު ގިނަ ލައްކައިން މުޅި ދޭހުގައި އުފުލައިފިޔޭ
ވަންތަކަން ދަމަހައްޓަމުން އަދި އަސްލުތައް ހިފަހައްޓަމުން
ކަންތަކެއް ކޮށް އަޒުމުގައި މޮޅު ނަންތަކެއް ދިރުވައިފިޔޭ
ވޯލްޑްކަޕް ގައި ޤަޠަރު ވިހި ބާވީސް މިކުރި ތަމްސީލުގައި
ގޯލްޑް މެޑެލާ ލާބަޔާ ގައުމީ ނަފާ ފަހިކޮށްފިޔޭ
ހާމަކޮށްދިން މާނަތައް ފުން ލާމަސީލު މިސާލަކުން
ކާމިޔާބުގެ މީރު ފޮނިކަން ޤަޠަރު ހާސިލް ކޮށްފިޔޭ
ހިތްހިތަށް އުފަލާއި ދިރުމާ މޮޅިތަކާ ރިހުމާ ދެމުން
އިންތިހާ ފުން އަސަރުތައް މާޒީގެ ފޭރާން ލައިފިޔޭ