ގިއުޅިލާށި މަލެއް މިސާލަށް ފޮޅުވަމުން މި ބަހާރުގައި
ނިއުޅެމުން ދާ ހިތުގެ ޖަޒުބާ އޮއްސަމޭ ދަރުބާރުގައި
ހީނލަމުން ދޮންވެލިގަނޑާ އައްސޭރިފަށުގައި ގޮނޑުދޮށާ
ބީހެނީ ރާޅާ އޮޔާ ފިރުމައި ދެމުން ނަލަހާރުގައި
ސާފު ހުދު ދޮން ތުނޑި ފިނޮޅު ވިދަނީ ރިހިންވާ މުތް ފަދައިން
މާދުރާ ގާތުން، އަރައިގެން އަންނަ އިރުގެ ޝުޢާއުގައި
މަލަ ރިވެތި ފަރި ފެންނަނީ ނަލަ ފެހި މުތީ ފަދަ ރަށްތަކޭ
ނަލަކަމާ މޫރިތިކަމަށް ކުރުނީސް ވަނީ ތާރީފުގައި
ނިޔަތުގައި ވިދަނީ ސަތޭކައިން ސައްތަ އިސްލާމީ މުތޭ
ހިޔަލުގައި ތިބެވޭށިޔޭ ތާއަބަދު މާތް ބަރަކާތުގައި
ވަރުވަރުގެ އެކި ފާޑު ހުރި މިސްކިތްތަކުން ފަސް ވަގުތުގައި
ހަރުއަޑުން އަޑަކަށް އެ އިވެނީ ބަންގިޔޭ އިޒުހާރުގައި
ރިވެތި ގޮތް ހުރި އާދަޔާ ވާރުތަވި ތަރިކަ ދިވެހިބަހާ
މިވެނި އެވެނިވި އަޑުއަޑާ ބަހުރުވަ ތަފާތޭ ރާގުގައި
މީރުވަސް ފެތުރޭ މަހައްލުގެ މާދުރަށް ހިންދުގެ ކަނޑަށް
ރީތިކަން ސިފަކޮށް ދެނީ ފަރި ޖަންނަތެއްގެ މިސާލުގައި
މީ މަގޭ ނަލަ ފަސްގަނޑޭ ފޫޅާއި މަސް އޮތް ބިންގަނޑޭ
މީ މަގޭ ލޮބުވެތި ހިތޭ! އިއްވޭ ނިދާމީ ފާޅުގައި
