ބަލާބަލަ ފެންނަ މަންޒަރުތައް ދުރާގާތުން އެހެރަ ފައްކާ
ބަލާ ފޫއްސެއް ނުވާނޭހެން އެއިން ނަލަ ސޫރަ ފަރި ދައްކާ
އަޅައި އިއްޗަށް އެހެރަ ދުވަމުން ދުވާލުގެ ލޯތަކަށް ބަލަމުން
އަޅައިގެން އެންމެ މޮޅު ގަހަނާ ސަފުން އެ ވަނީ ފިލައި ރައްކާ
ވަލަށް ވަދެ ދަރު ކޮށަން ކަތިވަޅި ހިފައިގެން ދިޔަ ދުވަސް މާޒީން
ބަލަން ތިބެ ކޯޅެނީ ފަންގަނޑު ހިބަރުހެން ކަނޑުމަތިން ދައްކާ
ކަމަށް ނިޝާން ހުއްޓަސް ޒަމާނީ ފާޑު ފާޅު ވިޔަސް
އަމާނާ ސުލްހައަށް ނުބަލައި ދަނީ ހުރި ވަރު ހަށިން ދައްކާ
ގަދައިގައި ޖުންޖުލައި ކޮޅިގަނޑު ފެޔަށް ޖެއްސޭނެޔޭ ހީކޮށް
އަދައިގެން ދެކިލުމަށް "ރަންދާން" ބަލާތަން ފެންނަނީ މައްކާ
ދަވާލޭ އޮހޮރަމުން ކަންކަން ސަހަލު މަގަކުން ކުރަން އެދި ތިބެ
ހަލާށޭ ބުނެ ކަމުން ކަނޑުމަސް ބޮނީ ޝަރުބަތު ފޮލާ ކައްކާ
ކަތަކު އިންސާފުގައި ތެދުވެރި ވަނީ ނަމަ އަދުލުގައި ހަމަހަމަ
ވަތަށް އިސް ޖައްސަނީ ކަސްތޮޅު އަޅައި ވޭނާ އަހުވަ ދައްކާ
ރަނގަޅު ހެޔޮ ބުއްދި ސިކުނޑިތަކުން ފިލީބާއޭފިލީބާއޭ
އަމަލު ކުލުނާއި ހަމްދަރުދީ ނެތޭ، ވަހުމާ އޮތީ ޝައްކޭ
ތަރައްގީ ކޯދުލައި ބިންގަނޑު ފަޅައިގެން އުތުރި އަރަނީއޭ
ވަރަށް ރީއްޗޭ ވަރަށް ޗާލޭ ބުނޭ އެންމެން އެ ދަޅަ ދައްކާ
ތޮޅޭހެން ކުޑަކުދީން ކުޅުމާ މަޖަލުގައި ލޮންނި ބޮންނިތަކާ
ކުޅޭ ތަން ފެންނަނީ އަދިވެސް ދެ ދަދަޅަޔަށް ދެ އިރު ބަތްކައްކާ