ޤައުމުގައި ހުރި ކެޕްޓަނަށް މާދުރު ލޮލަށް ފެންނަން ޖެހޭނެ
ފަޚުރުވެރި ދިވެހިންގެ ކުރިމަގު އަނދިރިވާ ކަންވެސް އެނގޭނެ

ޢަދުލު އިންސާފާއި ދީނުގެ އެންމެ މަތިވެރިވީ ޝިޢާރު
އަމުރު މަޢުރޫފުގެ ނުފޫޒުން ނެތިދަނީކަން ވެސް އެނގޭނެ

ދީނަކަށް ދީނުގެ ޝަރީޢަތަކަށް ޢަދުލް އިންސާފަކަށް،
ދީނުގައި އޮތް ގޮތް ބަލަން ބޭނުން ނުވާކަންވެސް އެނގޭނެ

މީހުނާ މީހުންގެ އަބުރާ ޢިއްޒަތާ އަދި ގަދަރުވެސް
ސީދަލަށް ހަމަ ފައުޅުގައި "ކަތިލައި" ހަދާކަންވެސް އެނގޭނެ

މަދަދުވެރިވީ މީހަކާ އަދި ރަޙުމުކުރި މިތުރެއްވިޔަސް
ބަދަލު ލިބެނީ އެންމެ ވިހަގަދަ "ޒަހަރަކުންކަން" ވެސް އެނގޭނެ

ޝޭޚުނާ ދީނީ ރޮނގުން ފުންނާބު އުސްހައި ޢާލިމުން
ރޭރުކޮށް ބޭޒާރު ކުރަނީ އުފަލަކަށް ކަމުގައި އެނގޭނެ

ގައުމުގައި ތިބި ހެޔޮ ލަފާ ޚިދުމަތް ތެރީން ބާކީވަމުން
ރަޙުމުކުޑަ ގޮތަކަށް އެކީ އިނދަ ޖައްސަނީ ކަމުގައި އެނގޭނެ

ވީއެތައް ވަޢުދާއި ޢަހުދާ ފުއްދުމަށް ބޭނުން ކުރަން
"ޖީބުތައް ހުސްކޮށް" ފަގީރުވެ ނިމިދަނީ ކަންވެސް އެނގޭނެ

ދިވެހި ލޮބުވެތި ކާބަފައިން ދެއްކެވި ރިވެތި އެ ސަގާފަތާ،
ދިވެހި ގައުމުގެ ޝާން ޝައުކަތު ގެއްލިދާކަން ވެސް އެނގޭނެ

މާލިމީއާ ކެޕްޓަނާ އަދި ފަޅުވެރީންނަށްވެސް ޔަގީން،
ދާންވި މިސްރާބުން ދަތުރު އޮޅި، ގެއްލުނީކަންވެސް އެނގޭނެ

އަރިހުގައި ތިބި "ފާސިޤުން" ރަނގަޅޭ މޮޅޭ، ގޮވަމުންދިއަސް،
ބަރިއަކަށް ހުރި ގިނަ ނުބައިތައް ކެޕްޓަނަށް ރަނގަޅަށް އެނގޭނެ

މުޅި ދަތުރު މިސްރާބު އޮޅިގެން ގިރި ފަރަށް އޮޑި ގޮސް އަރާއިރު،
ފުރި ބަނދަރު ނުހިފޭނެކަންވެސް ކެޕްޓަނަށް ރަނގަޅަށް އެނގޭނެ

ގިރިފަރަށް ނުބަލައި ކުރިން ތިޔަ އޮޑިވެރިން ކުރި ދަތުރުގައި،
ގިރިއަކަށް އުރިގެން އެ އޮޑި ފޫދިޔަ ހަނދާން ކޮށްލަން ޖެހޭނެ