ރޭދުވާ ތަކުރާރު އެބަވޭ އޭގެ އާދަ އެނގެންޖެހޭ
ހޭދަ ވާއިރު އުމުރު ދުނިޔޭން އޭގެ އަގު ދަންނަންޖެހޭ
ދަރުމައިން ލެއްވެވި ތިމާ ޚިލްޤަތުގެ ސޫރަ އެނގެންޖެހޭ
ގަރުބަވީ މާބަނޑުގެ ހާލާ މަރުހަލާ ދަންނަންޖެހޭ
ދެމެދަކުން މިބިމަށް ދެލޯ ހުޅުވާލި ހާލު އެނގެންޖެހޭ
ހިމެނިގެންވީ ގިންތި އަށް ތަސްލީމު ވާން ދަންނަންޖެހޭ
އަމުރު މަޢުރޫފާ ނަހީއާ މުންކަރާތު އެނގެންޖެހޭ
އަމުރު ބޮލަރުވި ބޮޑު އަމާނާތް އުފުލުމަށް ދަންނަންޖެހޭ
ޖިންސު ގައި ލެއްވެވި ތަފާތާ ހިކުމަތާއި އެނގެންޖެހޭ
ހިއްސުތައް ކިޔަމަން ކުރަންވީ ނައްސުތައް ދަންނަންޖެހޭ
ދީނަކީ ބޮޑު ނިއުމަތެއް މާތް އޭގެ ރޫޙު އެނގެންޖެހޭ
ސީދަލަށް މަގުގައި ދެވޭ ނުދެވޭ ތިމާ ދަންނަންޖެހޭ
ގައުމަކަށް ނިސްބަތް ތިމާވީ ބިމުގެލޯބި އެނގެންޖެހޭ
ދައުރަކާ ހައްގެއް ތިމާއަށް އޮންނަ އެބަ ދަންނަންޖެހޭ
ވެރިޔަކަށް މީހާ ވުމުން ވެރިކަމުގެ ހައްގު އެނގެންޖެހޭ
ދެރައަކަށް އަނިޔާއަކަށް ތަންނުދިނުމަށް ދަންނަންޖެހޭ
ހުރި ތިމާގައި ފެންވަރާ އަދި ހުރި މަގާމު އެނގެންޖެހޭ
ކުރި ހުވައި ވާވުލްޤަސަމް ތާއުލްޤަސަމް ދަންނަންޖެހޭ
ޙައްދުގައި ދިރުމެއް ވެޔޭ ޚަބަރުން މި މާނަ އެނގެންޖެހޭ
ހައްގަކަށް ކުޑަވެސް ޚިލާފެއް ނުކުރުމަށް ދަންނަންޖެހޭ
ވެލިކޮޅެއް ކުޑަ، މަށިކޮޅެއް ތަތް ފެށުނު އަސްލު އެނގެންޖެހޭ
ވެލިގަނޑަށް ވަދެ ވެލިގަނޑުން ނެރެވޭނެކަން ދަންނަންޖެހޭ
