ދިރުން ހުރި ހިތެއް މޭތެރޭގައި ނެތީހޭ
ބިރުން ވިރި އަޒުމު ކަންފުޅެއް ވެސް ނެތީހޭ
ތިމާމެންގެ ދީނާ ބަހާ ތަރިކަ މުދަލާ
ދިމާއަށް އެތިބަ ލޫޓުވާތަން ފެނޭހޭ
ދެހާޖީންނަކާ ދަންޑެހެލަކާ ގޮވައިގެން
ޖިހާދެއް އެކުރި މޮޅު ހަނދާން އަދު ނުވޭހޭ
ޖަހާލެއްވި ސީދާ އެ ލޮންސީގެ ތޫނުން
ފަހާލެއްވި ގޮތް ދުޝްމިނުން ނޭނގެނީހޭ
ދެކޭށޭ ވަޔާ ވިހުރިލާ ރަމްޒު ގައުމީ
ކެކޭ ލޭގެ ހޫނެއް ކަށީގައި ނުވޭހޭ
ކުރިން ހެދުނު ގޯހެއް ފަހުން ވިސްނުނީމާ
އަލުން ހެޔޮމަގެއް ދެން ހިފަން ނޭނގެނީހޭ
ދަރީންނޭ ދަރީންނޭ މަގޭ ހެޔޮ ދަރީންނޭ
ޙަރީމަށް މަގޭ ޙުރުމަތެއް އަދު ނުވޭހޭ
ނުވާނޭ ތިހެން އަތްއުރައިގެން ތިބޭކަށް
ޒުވާންކަމުގެ ފުރުޞަތު ބޮލާލާ ޖެހީހޭ
ހެވެއް ދުޝްމިނުންހޭ ކަލޭނޭ އެދޭނޭ
ލެއެއް ދިވެހި ގައުމީ ދަރިންގައި ނެތީހޭ
ރުކުންތައް ވެފުރިހަމަ ޝަރުޠުތައް ވެފައި ހަމަ
ހުކުމްދާރު ދީބެއް ނެރޭކަށް ނުވޭހޭ
ނިދޭކަށް ނެތޭ ފައިދަމާ ތަންމަތީގައި
މިދޭހަށް ފޮނުއްވެވި ސަބަބު ފަހެ އެނގޭހޭ
ދަމާ ފޫގަޅާ ތެދުވަމާހޭ އަމާޒަށް
ޒަމާނުގެ މުލައްދަނޑިތަކަށް ވިންދު ވޭހޭ
ކުރާށޭ ނަދުރު ނަފުސު ގައުމަށް ދަރީންނޭ
ފުރާނައިގެ އަގު ހޯދުމަށް ނޭދެނީހޭ
އަމޭ ދެން ބުނާށޭ ލެޔާ ކަށި މަހާ ވެސް
ނަމޭ ދިވެހި، ދިވެހީން އެދޭނީ ދޮގެއްހޭ
ލޮލުން ކަރުނަ ފާއްދައި ނުލާނަމަ މިހާލުން
ބޮލުން އޭގެ ޒިންމާ އަދާ އެބަ ކުރޭހޭ
މަގޭ އުމުރުގައި ދެން ނެތޭ ގިނަ ޒަމާނެއް
މަގޭ ކުރި މި ޝަކުވާ ހިތަށް ޞުލްޙަ ވޭހޭ
ކިޔަން ހާދަ ބައިތެއް މިޅެމުގައި އެބޯތޭ
ލިޔަން މިވަރު އެހެނަސް ފުދޭވަރު ނުވޭހޭ
