މިނިވަންދުވަހެއްގެ އިރު ފެނުން ތޮޅިލައިފިއޭ މިސާޙަތަށް
ހިނިތުންވި ރަންހަނދާންތަކެއް ދިރުވައިދެމުން އިޝާރަތަށް
ދިވެހީންގެ ފަސްގަނޑޭ މިއީ އިސްކަން ދެވުނު ސަލާމަތަށް
ދިވެހީންގެ ލޭ އަބަދު އެދޭ މިނިވަންކަމެއްގެ ޣާޔަތަށް
ޣާޒީރަދުންގެ ހިއްވަރާ މަތިވެރި ޖިހާދު ފަންވަރާ
ޢާޖިޒު ކުރުވި އެ ބުންވަރުން އަލިކޮށްލިއޭ މި އުންމަތަށް
ވިއްސާލި ގަދަ ތަފާލަކުން ޣާޒީ ހަސަންގެ ހިކުމަތުން
ބައްސާލިއޭ އެ ދުޝްމިނުން އިއްޒަތް ދެމުން ރިއާސަތަށް
ނާސިރުގެ ތޫނު ހަމަލަތައް ފޮނުވާލި ބާރު އުންޑަތައް
ވާސިލު ވިޔޭ އަމާޒަކަށް ލިބުނޭ ދިރުން މި ރާޔަތަށް
ނޫކަށިފުރާ ހުސެން ޝަހީދު ދެއްކެވި މިސާލު ލާމަސީލު
ދޫކޮށްލިއޭ ފުރާނަފުޅު ގައުމަށް ޓަކައި ހިމާޔަތަށް
މިނިވަންދުވަސް އަޔަސް މިތާ މިނިވަންކަމެއް މިއަދު ކޮބާ؟
މިނިވަންކަމެއް ނެތޭ ހިނގާ ވިސްނާއިރުން ސިޔާސަތަށް
ގައުމީ ސަލާމަތޭ ކިޔާ ފޮރުވަން އުޅޭ އެ ސިއްރުތައް
ގައުމީ ދެލިން ލިޔާކަމުން ބިރު އެބަގަނޭ މި ހާލަތަށް
ގައުމެއްގެ ފުން ކަރާމަތާ ގުޅިފައި ވަނީ އެ ހައިބަތާ
ގައުމުގެ އަމިއްލަވަންތަކަން ލިބިފައި ވުމޭ އެ ދައުލަތަށް
މިނިވަންކަމޭ ދުލުން ގޮވާ ގޮވެލިން ނެތޭ ފުދޭކަށެއް
މިނިވަންކަމުގެ މުލައްދަނޑިން ހިއްވަރު ނެރޭށެ އަތްއަތަށް
