އަދު ވަނީ ފަހެ ކީއްވެފައިހޭ މާތްވި އިންސާނިއްޔަތަށް
އަދު ނެތިއްޖޭ ކުލުނު ލޯތްބާ ހިތްތަކުން ހުރި ހިތްތަކަށް
ގެއްލި ނޭގޭ ދިޔަތަނެއް ވެސް ރީތި ހުރިހާ ސިފަތަކެއް
ފެންނަނީ އަދު ބަދުނަސީބުގެ ދުނިޔެއެއް އޮތް ލޯތަކަށް
ދެމެދުގާ ދެ އަޚުންގެ ވެސް މިއޮތީ ތަޅާފޮޅުމޭ ހިނގާ
ދެމެދަކުން އެއްވެސް ނެތޭ ނިމުމެއް ފެށޭ ހަރަކާތްތަކަށް
އެވެނިތާ ހުޅު ރޯކުރާއިރު މިވެނިތާ ގަތުލޭ އޮތީ
ނުއެނގެއޭ ކީއްކަން މިއުޅެނީ ވާން މި އަންނަ ޒަމާންތަކަށް
އިސްޖަހައިގެންނޭ ތިބީ ނުބަލަން މިތިބަ އެންމެން މިތާ
އިސްވެރިންގެ ޚިޔާނަތާ މަކަރާ ދޮގާ ހީލަތްތަކަށް
މަގުތަކާ ހަނިގޯޅިއާ މައިދާންތަކާ އަދި މީސްތަކުން
އަޑުނަގާ ތިބެގެން ރޮނީއޭ ފެންނަ ހަޑި ކަންތައްތަކަށް
ގިސްލަމުން ގޮވަނީ ކޮބައިހޭ އިއްޔެ އޮތް އެކުވެރި ގުޅުން
މިސްކިތާ މުންނާރު ވެސް ރޯ އަޑުއިވޭ ކަންފަތްތަކަށް
މުޅި ބިމަށް ވިހަލައިފިޔޭ ވިހަ ހަރުފައެއް އައި ލޫދިފާ
ކުޅިބަލަން ތިއްބާ މިހިރަ ކުރަނީ އަސަރު ދެން ހަށިތަކަށް
ގޭތެރޭގައި ގޭގެ ބައްތިން ހުޅުޖަހާ ރޯކޮށްފިއޭ
އޭގެ ކޮށްފައި ދިލަ އަސަރު މިވަނީ މިއަދު ކަންކޮޅުތަކަށް
މިބިމަކީ މިކަހަލަ ބިމެއް ނޫނޭ ކުރިން ފިނޑި ހޭރުވޭ
މިބިމުގާ ކުރިމަތިލިއޭ އެތަކެއް އެ އައި ހަމަލާތަކަށް
އަދު ކޮބައިހޭ އެފަދަ އެއްވެސް ހިއްވަރެއް ހުރި ކެރުމަކާ
އަދު ނެތޭ އޮތް ރައްކަލެއް ލެއަށާއި ގައުމީ އަގުތަކަށް
ކޮންމެ ބުރުގާއެއްގެ ކަންގަނޑު ގައި ވަނީ ލޭކަރުނައޭ
ކޮންމެ ގަހަނާއެއްގެ ޒީނަތް ހުށަހެޅިއްޖޭ ޒަޚަމަކަށް
ކަންމިހެން ދާއިރު ހިނގާ މަތިވެރިވި ދީން ވެސް ކުކުރަމުން
ކޮންމެވެސް އޮވެގެން ކަނެއްގައި އެބަ ގޮވާ ފަރުވާއަކަށް
ލޯތަކަށް ގައުމުގެ މިހާލަތު އެބަފެނޭ ހަމަ ސާފުކޮށް
ގޯތި ގެދޮރާ ހަރުމުދާ ހުރި ލޫޓުވޭތީ ވެދުމަކަށް
ތާކުވޭހޭ ހައިއަތެއް އުފުލަން މިކަން ޝަކުވާ އަކަށް
ކާކު ބޮލުގައިހޭ މިކަން އަޅުވަން އޮތީ އިލްޒާމަކަށް
ކުށުގެ ވާހަކަ ދޫތަކާ ގުޅިފައި ވިއަސް އުފުލަންޖެހޭ
ކުށުގެ ހިއްސާއެއް ވެއޭ ހަމަ ކޮންމެ ގައުމުގެ ފަރުދަކަށް
ތަރިތަކެއް ހުރިހާ ތިބީ އުޑުގާ އަމާނާ އުފަލުގާ
ތަރިތަކެއް ޚަންޖަރު ނުނަގައޭ ދެކޮޅުވެރި ހަމަލާއަކަށް
ލެއްވި މަތިވެރި ޝަރަފުގައި މިބިމުގެ ޚަލީފާއިން ކަމަށް
ވެއްޓުނީ އިންސާނުނޭ ނިކަމެތި މިފަދަ ދެރަ ހާލަކަށް
ދެކި މިހާލަތު ދުނިޔެ އެބަ ކުރެއޭ މަލާމާތް ފާޅުގައި
ހެކި ފެނޭ ގައުމުން ދިވެހި ދުނިޔޭގެ ވާނެ މިސާލަކަށް
ދެން ނެތީހޭ ލޯތްބަކާ ކުލުނެއް ލިބެން މިހަޔާތުގައި
ގެންދެވޭނީހޭ ޖަނާޒާ ކޮންމެވެސް ސަހަރާ އަކަށް