ރުފިޔާތަކެއް އެއްތަންވެލީ ކަމަކާ ވަރަށް ކަންބޮޑުވެގެން
ހަފަރާތުގައި އޮތް ނުކުޅެދުން އިޙްސާސްވެ މާ ހިތްދަތިވެގެން
ޝަކުވާއަކީ މައްސަލަޔަކީ ގައިބާރު ނެތެމުންދާކަމޭ
އެކަމާ ގުޅޭ ސިއްރެއް ނެތޭ އަދި ލޯތަކަށް ފާހަގަވެގެން
އިހު އެންމެ ރުފިޔާއެއް އުފުލި ބޭރުން އެ ގެންނަ ކުކުޅު ބިހެއް
މިހިރީ ދެތިން ރުފިޔާއަށޭ ހިއްލައިލެވޭން އަދު މަދުވެގެން
ކާރެއް އިހަށް ކޮއްޕާލައޭ ހަމަ އެންމެ ދިހަ ރުފިޔާ ހެމުން
ބާރެއް ކޮބައިހޭ ފަންސަވީސް ވެސް އަދުވެޔޭ ޢާޖިޒުވެގެން
މި ކަމުގެ ކޮބައިހޭ ސަބަބަކީ މައްސަލަ ދިމާވާ އަސްލަކީ
ފިކުރެއްނިކަން ކުރަމާހެ އޭ ރުފިޔާ މި ހުރިހާ އެކުވެގެން
ކާރާ ބިހާ ހުރިހާ މުދާ ބަރުވީހެ މާ އިހުނަށް ވުރެން
އާރާ މަދާ ރުފިޔާތަކުގެ މިދަނީ މުޅިން ކަންފަތިވެގެން
މި ސުވާލު މި ގޮތަށް ކުރެވުމުން ލިބުނޭ ޖަވާބެއް ހޫނުކޮށް
އަސަރާއި ރިހުމާ ކެކުޅުމާ އޭގައި ވިޔޭ ޝާމިލުވެގެން
ނޫނޭ އެޔެއް ނޫނޭ މި ވާ ގޮތަކީ އެހެންޏާ ނުއުފުލާ
އެއްޗެއް މިއަދު އުފުލަން ޖެހޭ ތީއޭ ނިކަން ވަރުބަލިވެގެން
އަދު އޭގެ ހުރިލެއް ބަރުކަމާ އަދިތޯ އެހެރަ ބިޔަ ފަލަކަމާ
ހެދިގެން އެ އުފުލަން ބޭނުމޭ ރުފިޔާ އެތައް މިލިޔަންވެގެން
އެކި ގޮނޑިގޮނޑީގައި ފަޚްރުގާ، ބެޓިގެންތިބޭ އެކިދައުރުގާ
އެކިޒާތު ބައެކޭ މި ބުނަނީ އުފުލަން ޖެހޭ ޤުރުބާންވެގެން
ދެން ހަކަތައެއް ހުންނާނެތޯ މެޓައެއް ވިޔަސް އުފުލޭނެތޯ
ގެންނަން އެކަނި ދާހިތްވިޔަސް ދެން އެންމެ އެއް ރުފިޔާވެގެން