އެރި އިރުގެ ދޯދިތަކުން ޢީދު ސަލާން ފޮނުވާލީ
ފަރިވެ މާތައް ހުވަނދުން ފޮނި-ފޮނި ވަސް ފަތުރާލީ
ބުލްބުލާ ބަޅިދު ކޮކާ މާބުރުތައް އުދުހި އައިސް
ޤުލްޝަނުން ފޮޅިފައިވާ ފިޔަ-ފިޔައަށް ތިރިކޮށްލީ
ފޫހިކަން ނެތް ފުރިހަމަ ރީތި އޮމާން ރާގުތަކުން
ދޫނިތައް ހާލިތެރޭން ލަވަ-ލަވަ ނަލަ އިއްވާލީ
ރޯޅި ފިނި ވައި ޖެހެމުން ޖައްވު ތެރޭ ފިރުކިލަމުން
ދޯޅުވެވި ގަސްގަހު، ރުށް، ފަން-ފަނުގައި ފިރުމާލީ
ކަނޑު ފަޅާ އޭގެ އޮޔާ ބަރަކާތުގެ ރާޅުތަކޭ
ގޮނޑުދޮށަށް ލައްވެލަމުން ލުއި-ލުއިކޮށް ބީއްސާލީ
ޗާލު ކުލަތައް މިފަޒާ ޒީނަތްތެރި ވާނޭހެން
ފޭދި އާފާޤު ތެރޭން އަލި-އަލިތައް ދިއްލާލީ
ފުސްކަމާ ރުޅިވެރި ނަފުރަތުގެ ބެލުން ތިރިކޮށްލާ
މުސްލިމުން ރޫޙު މަތީ އަތް-އަތް ތިބެ ގުޅުވާލީ
