ފަރިވެ ފޮޅިފައި އިން މަލެއް ލިބުނޭ އެއަށް ގޯނާކުރާން
އަރިހުގައި ލިބުނޭ އެކީގައި ރޭތަކެއް މުޅި ހުސްކުރާން
ފަތްތަކުގެ ނިވަލުން ނުކުމެ ހަމަ ހާމައަށް ދިން ފުރުޞަތަށް
ފަތްތަކުގެ ނިވަލަށް އަލުން ވެއްދީ ޙިމާޔަތް މާ، ކުރާން
ފިޔަތަކުގެ ބައްޓަންތަކަށް ޖެހި ޞަބުރުވެރިކަން އިސްކުރީ
ބިޔަ މަލުގެ ފިޔަތައް އެކީ ނޭދޭކަމުން ފިސްފިސް ކުރާން
އޮންނަ ބަދުނާމާ ތަފާތުވެދާ ހިނދުން ހިތް މާބުރެއް
ކޮންމެހެން ނޫޅޭނެޔޭ ފަރި މާތަކެއް ފުނޑުފުނޑު ކުރާން
ބުޅަލަކަށް ރޯ މަސް ނުބައި ވާނޭ ބުނާނީ ކާކުހޭ؟
ކުޅަ އެއީ ކެތްތެރިކަމޭ، އެ މަލަށް އަލުން ހޭހަންކުރާން
ބޯނެ ވަރަކަށް މާމަލުން ފޮނިބޯން ލިބޭ ފަހި ފުރުސަތަށް
ނޫނެކޭ ބުނަނީ ގޮވާ ނަފުސުގެ އެދުން ކިޔަމަން ކުރާން
މާމަލުން އެޅިޔަސް ހަނާ، އެކި ފުރަޞަތަށް ފުރަގަސްދެނީ
މާމަލަށް އެއްވެސް ދުކެއް ނޭދޭކަމުން ކުރިމަތިކުރާން
ރީތި، މަތިވެރި މާ މަލުން ފޮނިބޯން ލިބޭ ދަޢުވަތުތަކަށް
ތީތި ބޭނުން ނުކުރަނީ ކުށްފާފައިން ހިތް ހުސްކުރާން
ކޮންމެ ޅެމަކަށް ވިސްނިޔަސް "މާޒީ"ގެ މިދެނީ މެސެޖެކޭ
ކޮންމެހެން މަޞްދަރު ބުނާކަށް ނުޖެހެޔޭ، އެ ރިވާކުރާން
One Response
ވަރަށް ފޭރާން ހެޔޮ ޅެމެއް. ނިންމުންތައް އަދި ވަރަށް ސަޅި. ހުރިހާ ނިމުންތަކެއް "ރާން" އަށް ނިމިފައިވުން ސަޅި. އެކަމަކު "ބޯނެ ވަރަކަށް……" މި ބައިތު "މޫނެކޭ ލިބުނީ….." މިކަހަލަ ގޮތަކަށް ފެި ނަމަ އަދި މާ ފުރިހަމަވީސް" ހަމަ ޚިޔާލެއް