ރަޙުމަތާ ބަރަކާތް އޮހޭ މޫސުން މިއަދު ކުރިމަތި ވަނީ
އަހުލުނަށް ފުރުޞަތުތަކެއް މުޅި އުންމަތަށް އަދު ފަހިވަނީ
ވަހުމުތައް ދޫކޮށް ސިރާޠުލްމުސްތަޤީމަށް ދާން ވަނީ
ހެޔޮ ޢަމަލުތައް ގިނަކުރުން، އޭ އޮތް ތިމާއަށް ފުރުޞަތެއް
ހެޔޮކަމާ ގިނަ ދަރުމައިން މަންފާ ލިބޭނޭ މޮޅު ގޮތެއް
ހެޔޮ ބަހެއް ނޫނީ ނުބުނެ ހުރުމޭ އަބަދު ލާޒިމުވަނީ
ފަސް ވަގުތު ހަމަޔަށް އަދާކޮށް މުޅި ދުވާލުގެ ވަގުތުގައި
ގަސްތުގައި ނިޔަތާ އެކީގައި ރޯދައަށް ހުރެ އެ ގޮތުގައި
މަޞްލަޙަތު އިސްކޮށް މި މައްސަރު ހޭދަކުރުމޭ އޮންނަނީ
ރަޙުމަތު ފުރަތަމަ ދިހައިގައި ލިބުނު އަޖުރާ ހެޔޮ ޘަވާބު
އަޚުތަކުންނަށް ބަސްތަކުން ހެޔޮ ވިސްނުމަށް ގެނުވައި ޖަވާބު
"ފަހު ދުވަސް" އަންނާނެކަން ދަނެގެން މި ކަން ބޭނުންވަނީ
ރުއްސެވުން ވޭ މެދު ދިހައިގައި ރޯދަވެރިޔާއަށްޓަކައި
ފުއްސެވުން ދީލަތި އިލާހީ ދެއްވަޔޭ އަބަދަށް ޓަކައި
ހުސްވުމެއް، ޙައްދެއް ނުވާ ފަދަ މިންވަރަށް ދެއްވުން ވަނީ
ފަހު ދިހައިގައި އޮންނަނީ މަޣުފިރަތު އެދިގެން ދެންނެވުން
ފަހުދުވަހު ބުރަވާނެހެން ތިލަފަތް “ކުނީން” ޠާހިރުވެލުން
ރަޙުމަތޭ މުޅި ރޯދަމަހު މި ގޮތަށް އުޅޭ ނަމަ ދެއްވަނީ
މަރު ހަނދާންކޮށް ދެއްވަވައިތޯ ފާފަތައްވެސް ފުއްސަވައި
ހަރުދަނާ އީމާންކަމާއެކު މާތް އިލާހަށް ދަންނަވައި
ދަރުމައަށް އެދި ދިންނެވުން އެދި، އަތްތަކޭ އުފުލުން ވަނީ