މިއަދު ދުނިޔޭގެ މާދަރި ބަހުގެ މި ދުވަސް ހަނދުމަ ކޮށްލައްޗޭ
މިގައުމުގެ މޮށެ އުޅޭ މިދިވެހި ބަހާމެދު ވިސްނަވާލައްޗޭ
ބަފައިމެންދުނިޔެ ދޫކުރިއަސް ދިވެހިބަސް ތިޔަކުދިންގެ އަތުން
ހިފައިގެންގޮސް މިބަސް ދަރިދަރި ކޮޅަށް ވާޞިލު ކުރައްވައްޗޭ
ޒުވާންޖީލުގެކޮނޑަށްލައިގެން ދިވެހިބަސް އުފުލަމުންގޮސްފާ
ނުވާނޭބުނެ ދަރިންގެ ކޮނޑުން މިބަސް ވައްޓާ ނުލައްވައްޗޭ
މިމަތިވެރި ދީނުގައި ތިބުމާ އަމިއްލަ ބަހެއް މޮށެން އޮތުމާ
މިމަތިވެރި ނިޢްމަތަށް ޙަމްދާ ޝުކުރު އަބަދުމެ ކުރައްވައްޗޭ
މިގައުމުގެ ކާބަފައިންގެ ހަނދާންތަކާ ބަސްމޮށެ އުޅުނު އުޅުމާ،
ނަގައިނުމެލައި ޒުވާނުންނޭ މި ޛިކުރާ އައު ކުރައްވައްޗޭ
ދިވެހިދަރިޔެއް ކަމަށްވަންޏާ ބަހެއް ފުރަތަމަ ދުލުން މޮށެނީ،
ދިވެހި މިބަހުން ކަމާމެދުގައި ހަނދުމަ ނެތިކޮށް ނުލައްވައްޗޭ
ބަހުން އެކި ބަސްބަހުންމޮށެ، އުޅެން މޮޅުމީހަކަށްވިޔަކަސް
ބަހުން ފުރަތަމަ " ސަލާންޖެހި ނާށިގަނޑު" ދޫކޮށް ނުލައްވައްޗޭ
ދިވެހިބަހަކީ ދިވެހި ގައުމަށް އެކަނި އޮތް މިލްކަކަށް ވީތީ
ދިވެހި ގައުމުގެ ޒުވާނުން ފަޚްރުވެރި މިބަހަށް ވެދެއްވައްޗޭ
ދިވެހިބަފައެއް ކުރާއާދޭސް ދެފައިގައި ވެސް ހިފައި ރޮއެފާ
ދިވެހި ލޮބުވެތި ދަރިންނޭ އަޅެ ބަފައިގެ މިއަޑު އަހައި ލައްޗޭ
ނިޝާން ފެއްސާ ރަތާއި ހުދުން މިތާ ވިހުރޭ ކަމަށް ވަންޏާ
ފިސާރި ގަޔާވެގެން މިބަހަށް ނިކަން ހޭހަން ކުރައް ވައްޗޭ
