ހިތާމަތަކާއި ވޭނުން ރޮއެ ކަރުނަ ދެލޮލުން ހިކޭކަށް ނެތް
ހިތާނަފުސަށް އިތުރު އުފަލެއް މިގައުމާމެދު ލިބޭކަށް ނެތް
މިތަނުގައި ދެން އަލުން މުސްތަގްބަލެއް ފެންނާކަށެއްވެސް ނެތް
މިކަމުގައި ލޯބިވާ ގައުމަށް ކުރާކަށް ޚިދްމަތެއް ވެސް ނެތް
ނުބައި ޢަމަލާ ނުބައި ރޭވުންތަކުން މުޅި ގައުމު ނިމިދާއިރު
ނުބައި ރަނގަޅަށް ބަދަލު ކޮށްލަން އެހީވާނޭ ބަޔަކު އަދު ނެތް
އެމީހަކު އަތު ޖެހުނު ތަނަކުން އެމީހަކު އަތުޖެހުނު އެއްޗެއް
ދެމީހަކު އެކުވެގެން ކޮށްފައި ވިޔާދާ އެއް ކަމެއްވެސް ނެތް
ރަނގަޅުކޮށްލަން އުޅޭވެރިޔެއް އެހެން އުޅެ "ގޭނިގެން ދިއަޔަސް"
ރަނގަޅު ކަމަކަށް އެހީވާނޭ ބަޔަކު ގައުމެއް ގައެއް ވެސް ނެތް
ކަމެއް ގޯސްކޮށް ހިނގައިގެން ގޮސް ކަމެއް ރަނގަށް ބަލާއިރުގައި
ކަމެއްގައި ތިބި ބަޔަކު އެކަމުން ސަލާމަތްވާކަށެއްވެސް ނެތް
ނަޒާޙަތްތެރި ރަނގަޅު ވެރިޔެއް މިގައުމުގެ ވެރިކަމަށް ލިބުނަސް،
އަމާނާތްތެރި ކަމާއެކުގައި އެހީތެރިވާން ބަޔަކު އަދު ނެތް
މިގައުމުގެ ޝާން ޝައުކަތު ގެއްލިގޮސް ދުނިޔޭގެ މަސްރަޙްގައި
މި ވަޠަނަށް ލޯބި އޮތަކަސް ދެން މިތާ އުޅެވޭކަށެއް ވެސް ނެތް
މިއަދު މިއުޅޭ ބަޔަކު ބޭނުން ނުކޮށް ވާނޭ ގޮތެއްވެސް ނެތް،
މިއަދު މިއުޅޭ ބަޔަކު ލައިގެން ހިނގޭނޭ ކުރިމަގެއްވެސް ނެތް
މިޖީލު ވަނީ ނުބައި ޢަމަލާ ފަސާދަތަކުން ހަލާކުވެގޮސް،
މިޖީލު މިތާ އެކީ ނެތިގޮސް މެ ނޫނީ ރަނގަޅުވާކަށް ނެތް
