އެއްހާސް ނަސީބަށް ވުރެ ލިބޭ އެއަކީ ސަފުންވާ ނަޞްރެކޭ
ހެއްލުންވެވޭ ދުނިޔޭގެ ފޮނި ނުމެއެދި އެދޭ ފަދަ ވަޞްލެކޭ
ފަހުނޭވަޔަށް އެޅިދާ ހިނދުން ޢިލްމުގެ ރިވެލި ދެކިގެން އެއިން
އަހުރެންގެ ހުރި ހިލްމެއް ވަޒަން ކުރަމުން ކިރާ މީޒާނެކޭ
މިހިތުގެ ޒުވާންކަން ދަނެ އެއިން ނެރެދީ ޝަބާބުގެ ހުވަނދުތައް
ސިހިދާނެ ފަދަ ޙިކުމަތް މެދޭ، އެއަކީ ޢުލޫމުގެ އެދުރެކޭ
މުސްތަޤުބަލަށް ތައްޔާރުކޮށް ހުޝިޔާރުވާން ބުނެދެއްވަވާ
ފުސްކަން ފިލާހެން ދަޅަ އަރާ މިޔަ ތޫނުއޭ ހަތިޔާރެކޭ
ހަށިފާރަވެރިއެއް ކަމުވެގެން ހޭލައްވަމުން ނަފުސުގެ ދިރުން
ކަށިގަނޑު، ހަމާ، ލޭ، މަސްގަނޑާ، ރައްކާކުރާ އައްޑަނައެކޭ
ތަޚުތެއް މަތީ އިނުމީ ބަނދެވި އަޅުދާސް ކުރާ އެއްޗެއް ކަމާ
ފަޚުރެއް، ގަދަރު، އަދި ޢިއްޒަތެއް ނެތްކަން ބުނާ އިންޒާރެކޭ
ގަދަ ހިތްވަރާ އެކު ހިންމަތާ ޖެހިލުންމެނުވެ ކުރިޔަށް ހިނގާ
ފަދައެއް ދެވަނަ ނުމެވާ އެއީ ޖިސްމާ ގުޅޭ ބައިވެރިއެކޭ
ދަނޑުފަގުތަކާ ފަރުބަދަތަކާ ދާއިރު ހުރަސްކޮށް ކަނޑުތަކާ
ދަނޑިވަޅު ބަލާ ފިޔަވަޅު އަޅަން އިރުޝާދުދޭ އިލްޙާމެކޭ
ހިމަ ނާރުތައް އަތުގައި ކުރެހި ޗާޓުން ހިނގާ މަގުދައްކަމުން
ދިމަދިމަ ނުދާންވީ ދަތުރުގައި ބުނެދޭ އެއީ ސަމުގާއެކޭ
"ސަހަރޯ" ހިތައް ވެރިވާ ވަގުތު ހިތްވަރުމެކޮށް ކަނޑައެޅި އެއީ
ރަހަ މަރުގެ ދެކުމެއްވެސް ނުވާ ހަރުވީ އަމާޒުގެ ޢަޒުމެކޭ
ބަރުދާސްތުކޮށް ޠޫފާންތަކާ ވައިގަދަ ނުހަނު ކޮޅިގަނޑުތަކާ
ފަރުދާގެ ފުރަގަހުގައި ހެމުން މައްލަވަ ކުރާ އެކުވެރިޔެކޭ
ސަދުމައިގެ ހިތިތައް ހިނަވަމުން ބަނދެލާ ލަމުން ކަފުނުގެތެރަށް
ވަނދުކަން ޙަޔާތުން ފޮހެލަމުން ވަޅުލާ އެއީ ސަންދޯކެކޭ
- ޅެމުގެ ޚިޔާލާތު: ލެބަނާންއަށް އުފަން މަޝްހޫރު އިނގިރޭސި ޅެންވެރިޔާ، ޚަލީލް ޤިބްރާން ހައްދަވައިފައިވާ ޅެމެއް ބަލައިލުމަށް ފަހުގައި.