ވެރިޔެއްގެ އަބުރާ ޢިއްޒަތާ "ގެރިޔެއްގެ ޙާލަތަކަށް ދިޔުން"
ވެރިޔެއްގެ އަމުރަށް ބޯލެނބުން ބޭނުން ނުވޭ އަދު ރައްޔިތުން

ގައުމެއްގެ ނިސްބަތުގައި ހިނގާހައި، ކޮރަޕްޝަން، އަދި ވައްކަމާ،
ގައުމުގެ ވެރީން ބައިވެރިވުމުން، ލަދުވެތިވެޔޭ އަދު ރައްޔިތުން

ޢަދުލާއި އިންސާފުގެ ވަލިއްޔުލް ޙާކިމާ "ހަޑި ހޭވުމުން"
ބަދުނާމުވާ ހިނދު ދުނިޔެއަށް ދަތި ޙާލުޖެހެނީ ރައްޔިތުން

ކަނޑު ފަޅުތަކާ ގިރި ފަރުތަކާ ގައުމާއި ވަޠަނުގެ ހަރު މުދާ،
ރަހުނަށް ހެދީމާ ދެން ފަހުން، ހައިހޫނު ޖެހެނީ ރައްޔިތުން

މަކަރާއި ދޮގު ޙީލަތް ހަދައި ޢަމަލާ ބަހާ ސީދާ ނުވާ،
އަބަދާ އަބަދު އޮޅުވާލުމުން ބަދުނާމު މިވަނީ ރައްޔިތުން

މާދަން މިޖީލުގެ ކުރިމަގަށް ކާލާނެ ފަދައެއްވެސް ނެތުން،
ޙާލާ މެދަށް ރޮއެ ދެރަވަނީ ބިކަ ހާލުގައި ތިބި ރައްޔިތުން

"އަތުޖެހުނުހައި އެއްޗެއް ހިފައިގެންގޮސް ފިލައި ރައްކާވުމުން"
ގައުމުގެ މި ހިރަފުސް ބިންމަތީ މަރުވަން ތިބޭނީ ރައްޔިތުން