އުދުހިލަން ބޭނުން ވިޔަސް ނެތުމުން ވަރައިގައި ބަލަ ވަރެއް
އުދުހެވޭނީ ކިހިނަކުން އަމުދުން ނެތިއްޔާ ހިތްވަރެއް
ގޮސްލުމަށް ޕެރިހުގެ ޓަވަރުތައް ދެކި އެތާ ދުއްވަން ހަވީރު
ގަސްތުކުޅަޔަސް ނެތް ދެވޭކަން އަތު ނެތިއްޔާ ފަންވަރެއް
ރަސްމުތައް އެ ހިނގާ ސަގާފީ އާދަތައް އެކި ތަންތަނުން
ރަސްކަމުގެ ޝާހިއްޔަތެއް ފެނުމެއް ނެތޭ ނެތި ހިތު ވަރެއް
ލަންޑަނާ ލޮސްއެންޖެލިސް ކެލްފޯނިޔާ ދިޔަރެސްތަކުން
ފަންނުތައް ފެނުމެއް ނެތޭ ލޮލުގައި ނެތިއްޔާ ވިދުވަރެއް
އަންދަލުސްގެ މަޒާރުތައް ބާބިލްގެ ފަރި ގުލްފާމުތައް
ލަންޑަނުގެ ދާލަން ބަލަން ނުދެވޭނެ ނެތިއެއް ބުންވަރެއް
މިސްރު ބިޔަ އަހުރާމުތައް ދިގު ފާރު ސީނުގެ ދެކިލުމަށް
ވިސްނިޔަސް ނުދެވޭނެޔޭ ފައިގައި ނެތިއްޔާ ބަލަ ވަރެއް
ތާޖުމަހެލާ ނީލަކޯރާ އެންމެ ރީތި ނިޝާތުބާޣް
އާދެ ދެކިލާ ހިތް ވިޔަސް ނުދެވޭނެ ނެތި މާލީ ވަރެއް
އެންމެ އުސް ފަރުބަދަތަކަށް އަދި އެންމެ އުސް އެ ޓަވަރުތަކަށް
ފެންނަ ހެން ހުއްޓަސް އެހެން އެރިދާނެބާ ނެތި ފަންވަރެއް
ގަސްތުކުޅަޔަސް ރަސްކަމެއް ތަޚުތާއި ތާޖަށް ދީ ނަޒަރު
ރަސްކަލެއް ކަމުގައި ވެވޭހޭ ބޮލުތެރޭ ނެތި ހިތްވަރެއް
ބަދަލުތައް އެކި ކުލަތަކާ ނެރުނަސް އަމިއްލަވި ހައިބަތާ
އަޖަލު ޖެހިދާ ވަގުތު އައުމުން ނެތިދެޔޭ ހުރިހައި ވަރެއް
ބުނި މިބަސް ނުކުރާތި ދޮގު އަޝްރަފް މިއީ ދުނިޔޭގެ ހާލް
މުނިއަވަސް ވެސް ނެތެ ފިލާކަށް ނެތި ރަނގަޅު ހެޔޮ އިރުވަރެއް
މީ އުސޫލޭ މީ ހަގީގަތެ މީ ދުނިޔެ އިއްވާ ނިދާ
މީގެ ހެޔޮ އިބުރަތްތަކަށް ނޭގޭ ތަބާވާން ނެތި ވަރެއް
