ތިޔަ ކުރާ އަނިޔާތަކަށް ޖެހިލުން ދެނެއް ނުމެ ވާނަމޭ
ތިޔަ އަޅާ ބޮންތަކުގެ އަޑަކަށް ދެން މަށެއް ނުސިހޭނަމޭ
ގޭގެ ދޮރުވައްޓާ ލަމުން ވަދެގެން އައިސް ހަމަ ނެރެލިޔަސް
މޭގެ ވިންދެއް ނަމަ ޖަހާ އަހުރެން ދުލެއް ނުކުރާނަމޭ
ހިތުގެ އީމާކަން ފުނޑާލަން މަސްޖިދަށް ހަމަލާ ދިނަސް
ހިތުގެ ހާލިސްކަން މަތީ ދެމި މިގޮތުގައި ހުންނާނަމޭ
ނަފުސުތައް ބަލި ކޮށްލުމަށް އުންމީދުތައް ފޮރުވައިލިޔަސް
ޣަފުލަތާ ޝިރުކުގެ މަގުން އަހުރެން ޔަޤީން ނުހިނގާނަމޭ
ނިޔަތުގައި ބިން ފޭރިގަންނަން ގޮށްމުށުން ބިރު ދެއްކިޔަސް
ތިޔަ ކުރާ އަނިޔާގެ ދިލަޔަށް ކުޑަ ކަކޫ ނުޖަހާނަމޭ
މަދަރުސާތައް ތިރި ބިމާ ހަމަ ކޮށްލިޔަސް ރޫޅާ އަޅާ
ޤަދަރުވެރިކަން ގެއްލިދާހެން އާދެހެއް ނުކުރާނަމޭ
ފަޚުރުވެރިވީ މާތް މުޤައްދަސް ފައިތަކުން ޚުދު އަހަރެމެން
ފަޚުރުވެރި ވާނޭ ގޮތައް ގަދަ މިބިމުގައި ކޮށްލާނަމޭ
އުޑުތަކާ ބިން ވަކިވެދާ ފަދައިން ނަމޫނާ އަހަރެމެން
ފިނޑިކަމާ ހިތްވަރުގެ ފަރަޤެއް ދުނިޔެއަށް ދައްކާނަމޭ
މީ ޒުވާން ހިތް ތަކުގެ ވިންދޭ އަޑުއަހާށޭ ޢުންމަތުން
ދީނުގައި ސާބިތުވެ ހުރެގެން ކުރި މިތާ ހޯދާނަމޭ