އަރުތެރޭ ފިތި ތާށިވީ އިހުސާސްތަކުގެ ބޮނޑިވަރުތަކޭ
ވަރުވަރުގެ ނަޒުމުން ދިރޭ ޖަޒުބާތަކުގެ ބަންޑެލިތަކޭ
ދައުރުވާ ލޭ ނާރުތަކުގައި ދައުރުވުން ހުއްޓިއްޖެޔޭ
ޝައުގުގައި އުތުރެން ފެށީ ނަޣުމާތަކުގެ ރާހަތުތަކޭ
ލޯ ހިތުގެ ހުޅުވުނު ވަގުތު އަސްތާ ކަމަކު ދާކަށް ނެތޭ
ލޯމަތީ ސިފަވާން ފެށީ ބުހުތާންތަކުގެ މަންޒަރުތަކޭ
ރިއްސުމާ ކެކުޅުމުގެ ވޭނާ އެކުވެ ރިހުމާ ތަދުތަކާ
ހިއްސުތަކު އެ ނަށަން ފެށީ ސަދުމާތަކުގެ އިހުސާސްތަކޭ
ވިރުނުހެން ހީވެއްޖެޔޭ މޭގަނޑު ހިތާއެކުގައި ފިތާ
ބިރުތަކުން އެ ސިހުން ދެނީ އިންޒާރުތަކުގެ ގުޑުންތަކޭ
ފާޅުކޮށް ނޭނގޭ އެތައް ސިއްރެއްގެ ވާހަކަ ބުނެދެމުން
ގާތުގައި އެ ފެވެން ފެށީ އޮފުދަޅަތަކުގެ ނަލަ ކުލަތަކޭ
ވާނުވާ ނޭނގޭ އަނދިރިި ކިއްލާތަކާއި ބިނާތަކުން
މާނަވާން އެފެށީ ލިޔުނު ވާހަކަތަކުގެ ސަފުހާތަކޭ
ހަސްނެތިވެ ހިތު ކުރި ބިނާ ފުނޑުފުނޑުވި ހިނދު ދައްކަންފެށީ
އަސްލަކަށް ނުމެވާ އަވާމެންދުރުތަކުގެ ކުލަވަރުތަކޭ
ކަންވެ ނަން ނުތްވަސް ކަމުން ކަންކަމުގެ ނަންތައް ދިރި ނަމުން
ކަންމެ ނުވެ ނަން ވާން ފެށީ މޫސުންތަކުގެ ކޮޅިގަނޑުތަކޭ
ފުންސަ ބަލަ އިއްޒަތްމަތީ މަތިވެރި މަގާމާ ޝާނުގައި
ހުންނަ އިރު އޮހެމުން ދަނީ މޮޅު މުތްތަކުގެ ދަސްތާތަކޭ
ދުނިޔެ ދައްކާ މީ އުސޫލޭ އުނިކަމުން ވި ބަރާވެފައި
ބުނި ބަހެެއް އަޝްރަފް މިއީ އިބްރަތްތަކުގެ ފަރުދާތަކޭ