ޔާއިލާޙީ އަޅުގެ މިދުޢާ ހަޞުރަތުން އަޑު އައްސަވާށި
ދާއިމީ ދިރުމެއް ލިބޭހެން އަދި އިޖާބަ ކުރައްވަވާށީ
އިބަ އިލާޙުގެ ދީން މިވަޠަނުގެ ޖައްވު އަލިކޮށް ދިއްލަދޭށި
ހިޔަލުގައި މަތިވެރިވި އިސްލާމީ އަބަދު ހަމަ ލައްވަވާށި
އަދު ޙިދާޔަތުގައި މި ޤައުމުގެ ޖީލުތައް ސާބިތުވެދާށި
ވަނދުކަމާ ޣަފްލަތުގެ ފަޅުކަން ހިތްތަކުން ހަމަ ފިއްލަވާށި
ހުރުމަތާ ޝަރަފާ ކަރާމާތް މިބިމުގައި ހަމަ ލައްވަވާށި
ނުރުހުމާ ނަފުރަތުގެ ހުޅުތައް ދިވެހި ދީބުން ނިއްވަދޭށި
ދިވެހި ވަޠަނަށް ފަހިވެދާހެން ރަޙުމަތުގެ ވާރޭ ވެއްސަވާށި
ދިވެހި ބިންގަނޑު ބަރަކަތުން ފޯކޮށް އެކީގައި ތެންމަދޭށި
ރިވެތި އަހުލާޤީ ގަހުގެ، މޫތައް މިބިމުގައި ފަތުރަދޭށި
ރިވެތި ހުލްޤުގެ އިތުރު ކުރިތައް އަދި މިދީބުން ފަޅުވަދޭށި
ދިވެހި އެކުވެރި ޗަމަނުގައި މާތައް ޢަބީރުގެ ފޮޅުވަދޭށި
ރިވެތިވީ މިފަޒާގެ ތެރެއަށް ހުވަނދުލާ ވަސް ފަތުރަވާށި
ކަނޑު ފަޅާ ގިރި ފަރުތަކާ ވިލުތައް ތިޔާގި ކުރައްވަވާށި
ފަނޑުކަމާ ނާމާންކަމުން ދިވެހިން މިތާ ދުރުކޮށްލަދޭށި
ދޫނިތައް ހާލީތެރޭ ގޮވި ރާގުތައް އަބަދަށް އިވޭށި
ހޫނުކަން ކެނޑި ދާނެ ފަދައިން ރޯޅިވައި ފަހިކޮށްލަދޭށި
ދިވެހި ރުކު ބޮންތީ ފަނުގެ ފެހިކަން އިތުރު ކުރައްވަވާށި
ރިވެތި ޤައުމީ ވަންތަ ސިފަތައް ޖީލުގައި އާރޯ ކުރާށި
ދޮންވެލީ ތުނޑިޔަށް ޖަހާ ބަވަނައިގެ ރާޅުން މަތަކުރާށި
ކޮންމެ ވެލިފުކަކީ މިދީބުގެ މިލްކަކަށްވާ ހައްދަވާށި
ޙަސަދަވެރި ކަޅިތަކުގެ ނަޒަރުން އަހަރެމެން ރައްކާކުރާށި
މަސަލަހާ ސުލްޙައިގެ ދީބެއް ކަމުގަ ދިވެހިން ލައްވަވާށި
ޙާއިނުން އަދި ދުޝްމިނުން ބޭޒާރު ކޮށްލާ ދެއްވަވާށި
ލާއިޤުން ޤައުމުގެ ވެރިން ކަމުގައި ޚިޔާރު ކުރަށްވަވާށި
އެންމެ ފުރިހަމަވީ ސިޔާދަތު ދިވެހި ދީބަށް ދެއްވަވާށި
އެންމެ ހިނދުކޮޅަކަށް ވިޔަސް އަޅުވެތިކަމަށް ފުރުސަތު ނުދޭށި
ފެހި ރަތާ އަދި ހުދުގެ ދިދަޔަށް ހައްޤު ހުރުމަތް ދެއްވަވާށި
ބެހި އެދާ މިނިވަން އޮޑީ މިސްރާބު ސީދާ ކޮށްލަދޭށި
