އީދު ދުވަހަށް އަލިވިލުން ތަކުބީރަކުން ގުގުމައިފިޔޭ
މީ ދުވަސް ލޭފައިގެ މަތިވެރި ރޫޙުގައި ދައްކައިފިޔޭ
ވީ ދުވަސް ފުރަބަންދުގައި ނައްތައި ހަނދާނުންލައިފިޔޭ
އީދު އަޟުޙާ ދޫތަކުން ކިޔަމުން މުބާރިކު އެންމެނަށް
ވީ ދުވަސް ފުރަބަންދުގައި ދޫކޮށް ފުރައިފިޔެ ރަށްރަށަށް
މީ ދުލެއް ލިބުމުން ކަރަންޓީނުން ސަލާމަތް ވެއްޖެޔޭ
ހެއު ޝުޢޫރާ ހެޔޮ ދުޢާއާ ލޭފަވެތިވީ ބަސްތަކުން
އެއުރެމެންގެ މުޤާބިލަށް އެއް ހާޒިރަށް ދެވިފައިވުމުން
ހެއު ނަސީބުގެ ފާލަކަށް މުޅި ޤައުމު ވެސް ތަންދީފިޔޭ
މާތްވި މަތިވެތި ކަޢުބަތުﷲގެ ވަށައިގެން ހިނގުމުގައި
ވާތްގަކަށް އެދެމުން ޠަވާފުގެ ހަތްބުރެއް ހަމަކުރުމުގައި
ގާތްކަމާ ގައިދުރުކަމާއެކުގައި އެކަން ނިންމައިފިޔޭ
އަދި ޞަފާ، މަރުވާ ދެމެދުގައި ސަޢުޔުކޮށް އިޙުރާމުގައި
މަދަދު އެދިގެން މާތް އިލާހުގެ ޙަޟުރަތަށް ދެންނެވުމުގައި
އެ ދިހައެއް ހަމަވެގެން ދިޔަ އިރު އުފާ ލިބެވިއްޖެޔޭ
އެއް ސަފެއްގައި އެއް މިނެއް ޢަރަފާތުގައި ތިބުމަށް ފަހުން
އެންމެހައި ރުކުނެއް އެތަރުތީބުން ފަރުޟުވެސް ނިންމަމުން
ދެން އެއައި އުފަލެއް ތަނަށް، މުޅިއުންމަތަށް ފޮނުވައިފިޔޭ
ޙައްޖު އަޟުޙާ ޢީދުގައި ރަށު ފެންވަރުން ބައިވެރިވަމުން
"ހައްދު"އަށް މިއަހަރު މި އީދަށް ދާނެ ފުރުޞަތު ނުލިބުމުން
ރައްދުކުރުމުން ހެޔޮ އެދުން "މާޒީ"ގެ ހިތް ފޮޅިލައިފިޔޭ
