ލޯބި ވާކަން ހާމަ ކޮށްދޭން ލަފުޒަކަށް ބޭނުންވެޔޭ
ލޯބިވެވުމަށް ފަހު އެ ލަފުޒަށް މާބޮޑަށް ބޭނުންވެޔޭ
ތަރިތަކާ ތަރިތައް އެ ފިޔަޖަހަމުން ރެޔާއި ދުވާލުގައި
ބަރިޔަކަށް ތިބެ އެތުރިގެން ލޯބީގެ ނަޣުމާ އިއްވަޔޭ
ހަނދު ހަނދަށް މަދަދުގެ އުޖާލާ ނަލަކަމަށް އެދިގެން ސަފުން
ހަނދުވަރާ ހަނދުވެސް ބަޔާންކޮށް ލޯބި ބުނެ ސިފަކޮށް ދެޔޭ
އުޑުމަތީގައި ކޮޅުކޮޅަށް އެކި ދަންދަމަށް ވިހުރޭ ވިލާ
މަޑުމަޑުން ލޯބީގެ ސިފަވީ ލަފުޒު ލޯބިން އަންގަޔޭ
ބީހެމުން ވައިރޯޅިތައް ޖައްވާ ފަޒާގައި ބޮސްދެމުން
ހީނލަމުން ލޯބީގެ ނިޔަނެތި ލަފުޒުތައް ގުގުމައިދެޔޭ
ގަސްތަކާ ވެޔޮތައް ހިމޭނުން ވިނަތަކާ މުޅިކާއިނާތު
ބަސްތަކުން ލޯބީގެ ލަފުޒާ ފާޅުކޮށް ބުނެދޭމެޔޭ
ދޫނިސޫފާސޫފިތައް ނަލަ އަންދަލީބުގެ އަޑުތަކުން
ލޯބިވާކަން އަންގަމުން ގުލްޝަން އުފާވެރިކޮށްދެޔޭ
ކޯޅިތައްމާ ހެލިލަމުން ފަތިހުގެ ފިނީ މާފޮޅުވަމުން
ރޯޅިޔާ ވައި ތޮޅިލަމުން އެ ލަފުޒު ބަޔާންކޮށް ބުނެދެޔޭ
ރާޅުތައް ދިޔަރެހު އެ ބޮސްދީ ބީހެމުން މާމަޑުމަޑުން
ފާޅުގައި ލޯބީގެ ލަފުޒުން ދޮންވެލީ ފިރުމައިދެޔޭ
ލޯބިވަންޏާ ލޯބިވާކަން ފާޅުކޮށް ހިނދުހިނދުކޮޅުން
ލޯބި ބުނެދޭން ލޯބި ލަފުޒެއް ގައިމުވެސް ބޭނުން ވެޔޭ
