އިރުއަރަމުން ދޯދިތަކުން އިއްވާލީ – عيد مبارك
ފަރިވެލަމުން ފަރި މާތައް ފޮނުވާލީ – عيد مبارك
ތަރިހަނދު ރޭގަނޑު ނޫރުން ދިއްލާލީ – عيد مبارك
ހުރިހާ މުސްލިމް ހިތްތައް ހެއްވާލީ – عيد مبارك
ހިނިތުންވެ ސަލާންކޮށްލާ، ހާލާތު ބަޔާންކޮށްލާ
ފިނިހިތްވެ އަޚުންއުޚުތުން ހިތް ހެޔޮކަން އާ ކޮށްލާ
ފޮނި ރާގުން ހިތް ލޯބިން ގުޅުވާލީ – عيد مبارك
ހުރިހާ މުސްލިމް ހިތްތައް ހެއްވާލީ – عيد مبارك
އަޅުކަމުގެ ދަރެސްގާހުން، އަޅުތަކުނަށް ދިން ނޫރުން
ފަޅުކަން ހުރިހާ ހިތަކުން ނެތިކޮށް ފޮހެލީ ކޫރުން
ދިން ޢަޒުމުން، އަލި ވިދުމުން ބަބުޅާލީ – عيد مبارك
ހުރިހާ މުސްލިމް ހިތްތައް ހެއްވާލީ – عيد مبارك
ވެދުމާ ހަދިޔާ އޮހެނީ، މަދަދާ ޤަދަރާ ވެހެނީ
ތަދުތައް ވޭނީ އުފުލާ މިތުރުންނާ ލާމެހެނީ
ހަމްދަރުދީން،އިޙްސާނުން، ގުގުމާލީ – عيد مبارك
ހުރިހާ މުސްލިމް ހިތްތައް ހެއްވާލީ – عيد مبارك
ދުރު ގާތް އަދި މާ ދުރުގައި، ދުނިޔޭ އެކި ކަންކޮޅުގައި
ދިރެމުން ލޯބިން މި ހިނގާ އިސްލާމީ އަޚްކަމުގައި
ޙުރުމަތުގާ ބަރަކަތުގާ ފޮޅުވާލީ – عيد مبارك
ހުރިހާ މުސްލިމް ހިތްތައް ހެއްވާލީ – عيد مبارك
