ހިތް އެދޭ އެ ހިތާއެކީ ގޮސް ރޮއިލުމަށް ޢަރަފާތުގައި
ނިތް އެ ދުހު ތިރިކޮށްލުމަށް ތައުބާގެ މާތް ޙަރަކާތުގައި
އުފުލަމުން تكبير، تحميدގެ އަޑާ އަދި تلبية
އުފަލުގައި ޢީދާއި ދެން ބައްދަލުކުރަން ބަރަކާތުގައި
ހަމަ މިއާއެކު އޮހޮރިދޭ ލޭކަރުނަތައް ދެ ލޮލުގެ ތެރޭން
ހަމަ މި އިސްލާމިއްޔަ ޖިސްމުގެ ޙާލު ދެކި ޖަޒުބާތުގައި
ޝާމުކަރައިން ކޮން ހިތެއް އުފަލުގެ ލަފުޒު ވެސް ދަންނަނީ؟
ހާދަ އިންސާނުންނެކޭ އެ ވަނީ ގިލަން އާފާތުގައި
މުޅި ފަލަސްޠީނާ ޢިރާޤާ ސީރިޔާ އަދި ލީބިޔާ
ދޮޅި މިއަދު އުފުލައި ލަނީ ނޭވައި މަރުގެ ސަކަރާތުގައި
މި ފިކުރާ އިޙްސާސްތަކޭ ޢީދާ އެކީ ރޫޙަށް ދިނީ
ނަފުސު ހަމަ ރޮއި ގިސްލަނީ ފާއިތުވިހައި ސާޢާތުގައި
ރަޙްމަތަށް އެދި އަތް ނަގައި މި ދުޢާވެވޭ ހިތި ޙާލުގައި
ތަހުނިޔާ ބަރުތީލަކުރަމޭ އައި މި ޢީދުގެ ޒާތުގައި
