ރަމަޟާނެ މީ ތިބާގެ ހިޔާ ދިން މުސާފިރޭ
ހަމަ ގައިމެ ތިބާއީ ހެޔޮކަންކަމުގެ ނާޒިރޭ
އާފާތުގައި ޙަޔާތުގެ އުރެދޭ ޟަމީރުތައް
ފާފައިން ދުރަށް ލުމުގެ ތިޔައީ އަޞްލު މާހިރޭ
ރޫޙާ ފުރާނަ މަތިވެރި ޢާލަމްތަކާ ގުޅޭ
ރޫޙީ ދަރެސްތަކާ އިލްހާމުގެ މުޙާޟިރޭ
ހެޔޮ އަމަލަކާ އެކަނި ހެޔޮ ނިޔަތެއް އޮތަސް ހެވޭ،
ތިޔަ އަރިއަހުން އިނާމު ނުދޭ އަޅަކު ނާދިރޭ
ޝައްކެއް ނެތޭ މި ދީލަތިކަމުގައި ފަގީރަކީ
މައްކާރު ދުނިޔެ ނޭނގި ދަމަށް ހުންނަ ސާހިރޭ
އީމާން މި ހިތުގެ އުތުރި ދެޔޭ ފުން ޔަޤީނުގައި
ސީދާ ތިބާ ފޮނުއްވީ މަޢުބޫދު، ޣާފިރޭ
ދީވާނުގައި ތިބާގެ އޮހޭ މަޣުފިރަތު އަދައި،
ރޫޙާ ހިތާ މި ނަފުސު، ޝުޢޫރާއި ހާޒިރޭ
ލޯ ކަރުނައިން ތެމިއްޖެ ތަ؟ ޤަދުރުގެ ޢަފޫގެ ރޭ
ބޯކިރުފޮދެއްގެ ހުދުކަން ފަދަ ނަފުސު ޠާހިރޭ
ދެކިފައި މި ބަރަކަތާ ރޫޙާނީ ސަޢާދަތާ
ރަކި މޫނަކާ އެކީ އެހެރީ ހިމަ ވެ ކާފިރޭ
ޢަޤުލާ ޒަމީރު ބުނެޔޭ މި ހިނދުގެ ޙަޔާތަކީ،
ތަޤުވާގެ މާތް އޮޑީގެ އަމާޒާއި މޯހިރޭ
ދިރުމާ މަރާއި ދެމެދުން އަދު ލޯ ދެކެންފެށީ،
ފިރުދައުސު މަރުޙަބާގައި ފަރިވާ މަނާޒިރޭ
އުންމީދު ފިޔަޖަހައިލި ވަގުތު، އިއްވުމުން ވަދާޢު
ފުން އަސަރުގައި މި ޅެން މި ހެދީ ޅެމުގެ ޝާޢިރޭ
