ނުދާށޭ އޭ ޝަހުރު ރަމަޟާން ވިދާ ކަރުނައިން ނިދާ އިވޭނީ
އުދާހާ ނުދަނަވަސްކަން ތިޔަ ވަދާޢުން މުޅި ހިތަށް ލިބެނީ
ޛިކްރަކީ އެންމެ ފޮނި މާމުއި އެއިން ރޫޙަށް ޝިފާ ލިބިދޭ
ޛިކްރުކުރުމާ ތަދައްބުރްކުރުމުގައި، ނިދިވެސް ހަނދާން ނެތިދޭ
ޛިކުރުކުރި ކޮންމެ ހިތަކުން ނަފުސަކުން މެޔަކުން މިހެން ބުނެދޭ
ނުދާށޭ އޭ ޝަހުރު ރަމަޟާން، ވިދާ ކަރުނައިން ނިދާ އިވެނީ
ޙިރާއާ ބަދުރު، މައްކާ ފަތަޙަ މީ ހަނދުމައިގެ މީރުކަމޭ
ދިރާލައި ހެޔޮކަމުގެ އުންމަތް ވިދައި ބަބުޅައިލި ރީތިކަމޭ
މުރާދީ ކޮންމެ ނިތަކުން، މޫނަކުން، ލޮލަކުން މިހެން ބުނެދޭ
ނުދާށޭ އޭ ޝަހުރު ރަމަޟާން، ވިދާ ކަރުނައިން ނިދާ އިވެނީ
ޞިޔާމުގެ މަދްރަސާ ތިޔައީ ހެވާ ތަޤްވާގެ މާތް ކިއްލާ
ޤިޔާމު ސުޖޫދުގައި ރޫޙާ ޟަމީރާ ނަފުސުތައް ދިއްލާ
މިޔާއެކު ކޮންމެ ގެޔަކުން، ނޫރަކުން، ވޮށަކުން މިހެން ބުނެދޭ
ނުދާށޭ އޭ ޝަހުރު ރަމަޟާން، ވިދާ ކަރުނައިން ނިދާ އިވެނީ
ކިހައި ފަޅުވާނެހޭ ދެން އޮތް ނުމޫސުމު އަނދިރި ރޭތަކުގައި
ފިހާރައިން އެޅުވި ސޭލް ނިމިގޮސް، ދަރައިވިކި އެކަނިވެރިކަމުގައި
މިހާލުން ކޮންމެ ބިމަކުން، ތަރިޔަކުން، އުޑަކުން މިހެންބުނެދޭ
ނުދާށޭ އޭ ޝަހުރު ރަމަޟާން، ވިދާ ކަރުނައިން ނިދާ އިވެނީ
ބަދީލެއް ނޭދި ލޯބިން މުށްތަކާ ހިތްތައް ހެމުން ހުޅުވައި
ޙަދީޤާއެއް ފަދައިން ދެރަ ނިކަމެތީންނަށް ރޯދި ފަހިކުރުވައި
ވިދީލަތި ކޮންމެ އަތަކުން ރޫޙަކުން ލޮލަކުން މިހެން ބުނެދޭ
ނުދާށޭ އޭ ޝަހުރު ރަމަޟާން، ވިދާ ކަރުނައިން ނިދާ އިވެނީ
One Response
ވަރަށް ރީތި ސިފަކުރެއްވުމެއް
ވަރަށް ހިތްގައިމު