ރޯދަ މަހުގެ ފަހު ދިހައިގައި ހިނގައިފައި ވެސް ދަމުނަމާދަށް މިސްކިތަށް ދާން ބޭރަށް ނުނުކުމެވޭ ގޮތަށް މާލެ ސަރަހައްދުގައި މިރެއިން ފެށިގެން ކާފިއު ހިންގައިފައި އޮތަސް، ދަމުނަމާދަށް މިސްކިތަށް ދެވޭނެ ކަމަށް އިސްލާމިކް އެފެއާޒް މިނިސްޓަރު ވިދާޅުވެއްޖެވެ.

"ދަމުނަމާދަށް ދާ ފަރާތްތަކަށް ހިނގާފައި (މިސްކިތަށް) ދެވޭނެ،" އިސްލާމިކް އެފެއާޒް މިނިސްޓަރު ޑރ. އަހުމަދު ޒާހިރު "އަދިވެސް" އަށް ވިދާޅުވިއެވެ.

ޑިރެކްޓަރ ޖެނެރަލް އޮފް ޕަބްލިކް ހެލްތު މައިމޫނާ އަބޫބަކުރު މިއަދު ނެރުއްވި ގަރާރުގައި ވަނީ "މާލެއާއި ހުޅުމާލެއާއި ވިލިނގިއްޔާއި ގުޅީފަޅާއި، ތިލަފުށްޓާއި، ހުޅުލޭގައި ކޮންމެ ދުވަހެއްގެ ރޭގަނޑު 9 އިން ފަތިހު 4 އަށް، އެއްގަމު އުޅަނދުފަހަރު ދުއްވުމާއި މަގުމައްޗާއި އާންމު ތަންތަނަށް މީހުން ނުކުމެއުޅުން ހުއްޓައިލުމަށް" އަންގައިފައެވެ.

"އެހެންނަމަވެސް މި ވަގުތުގައި ޕޮލިހުންގެ ހުއްދަޔާއެކު ޑެލިވަރީގެ ޚިދުމަތް ދެވޭނެއެވެ." އެ ގަރާރުގައިވެއެވެ.

ރޯދަ މަހުގެ ފަހުދިހައިގެ ރޭތައް ފެށުމާއެކު މާލޭގައި 14، ހުޅުމާލޭގައި ތިނެއް އަދި ވިލިމާލޭގައި އެއް މިސްކިތުގައި ވަނީ ދަމުނަމާދުކުރަން ފަށައިފައެވެ. އާއިލާއާއެކު ވަރަށް ގިނަ ބަޔަކު ހުޅުމާލެ އާއި މާލޭގެ މިސްކިތްތަކަށް ދަމުނަމާދަށް ދެއެވެ.

ދަމުނަމާދު ކުރަނީ ދަންވަރު 2 އިން ފެށިގެން 3:30 އަށެވެ.

އިސްލާމިކް މިނިސްޓްރީން ކުރި ޓްވީޓެއްގައި ވެސް ބުނީ ރައްކާތެރިކަމުގެ ފިޔަވަޅުތަކާއެކު ދަމުނަމާދަށް މިސްކިތަށް ދެވޭނެ ކަމަށެވެ.

ރައްކާތެރިކަމުގެ ފިޔަވަޅުތަކާއި އެކު ފައިމަގުގައި މިސްކިތަށް ދަމުނަމާދަށް ދިއުމުގެ ފުރުސަތު ފަހިވެފައިވާ ވާހަކަ ދަންނަވަމެވެ.#MVIaffairs #Ramadan42 #Roadha42

— Ministry of Islamic Affairs (@MVIaffairs) May 6, 2021