ދޭ އުސޫލުން ދޭ ކަމަށް ވަންޏާ ރިވެތި ގޮނަކަށް ގޮނެއް
ދޭށެ ދަރިފުޅު ދޭ ހިނދުން ދެ ކޮލަށް ހެމުން ދޮނަކަށް ދޮނެއް
ބޭނުމަކު އެ ފަހުން އަދާކުރުމަށް އަޚާއަށް ދޭ ދިނުން
ދޭ ވަރަށް އިތުރެއް ނުކޮށް ހޯދާށެ ދިން ރަނަކަށް ރަނެއް
މަޖަލަކަށް ވެސް، ގެއްލުމެއް ދޭ ފެންކުޅީގައި ހަމަ ހިލައި
ޖަދަލުކޮށްފައި ގޮސް ޖަހާކަށް ނުޖެހެޔޭ ފެނަކަށް ފެނެއް
ނަމަވިޔަސް އަނެކުންގެ ދީލަތިކަމުތެރޭން ލިބި ގޮސް ވަދައި
ދެމި ނަނެއް ކެނޑި ބުރި ވި ނަމަ ދޭންވާނެޔޭ ނަނަކަށް ނަނެއް
ހަނުލުމަށް ވަޅި ދިން ހަނެއް ތެޅިގެން ބަދަލުގައި އޮޑިހަނެއް
ގަނެ އެ ހަނު ދިނަކަސް ނުވޭ ދިންކަމަކަށެއް ހަނަކަށް ހަނެއް
ފެތުނު އޮޑިޔާ އެކު ރިޔަލު ދަށުވުން ދަރީންނޭ މާ ހެވޭ
އަތު ޖެހިއްޖެއްޔާ ކަނަކު، ފެނިދާނެޔޭ ކަނަކަށް ކަނެއް
ތަރިޔަކަށް އުޑުގައި ވިދާ، ނުގޮވާށެ އަންނާށޭ ކިޔައި،
ހުރިކަމަށް ހީކޮށް ވިދަން ބިމުގައި އެއަށް ތަނަކަށް ތަނެއް
ވާނެހޭ އިންސާފަކަށް މާވަހަރު ކަފަޔާ ކިރުމުގައި
ބާރު ހުރި އަތަކުން އެޅީތީ ބައި ހަމަވެ މަނަކަށް މަނެއް
ހަރުފައެއް ނަށްޓާންވެގެން ޖާހިލަކު ނަށަމުން ފުމުނަކަސް،
ހަރުދަނާ މާތް މުއުމިނަކު ނުފުމޭނެޔޭ އޮނަކަށް އޮނެއް
ބުނެ ބަލާށޭ ވާދަކޮށް ފަރުބަދަތަކާ ހެދިދާނެހޭ؟
ދުނިޔެއަށް ވެސް ލާހިކެއް ހޭ ފޮނުވުމަށް ހޮނަކަށް ހޮނެއް