"ދިވެހި ގައުމީ ހަރަކާތް" ނުވަތަ ދިވެހި ނެޝަނަލް އެކްޝަން (ޑީ.އެން.އޭ) އުފެއްދުމަށް މަސައްކަތް ފެށިކަން އިއުލާންކުރުމަށް މާދަމާ ރޭ ހާއްސަ އިވެންޓެއް ބާއްވާ ގޮތަށް ހަމަޖައްސައިފިއެވެ. މި އިވެންޓުގައި ކުރީގެ ފޮރިން މިނިސްޓަރު ދުންޔާ މައުމޫނާއި ކުރީގެ ހޯމް މިނިސްޓަރު އުމަރު ނަސީރު ވެސް ވާހަކަ ދެއްކެވުމަށް ވަނީ ހަމަޖެހިފައެވެ.

ޑީ.އެން.އޭގެ އިސް އޮފިޝަލަކު "އަދިވެސް" އަށް ވިދާޅުވީ ޑީ.އެން.އޭ އުފެއްދުމަށް މަސައްކަތް ފެށިކަން އިއުލާންކުރުމަށް ބާއްވާ ހާއްސަ އިވެންޓު މާދަމާ ރޭ 9 ޖަހާއިރު ސަންގު ޓީވީން ދުރަށް ދައްކާނެ ކަމަށެވެ. މި އިވެންޓުގައި، ދުންޔާ އާއި އުމަރު ދައްކަވާ ވާހަކައިގައި، ރާއްޖޭގެ ދީނީ، ގައުމީ އަދި ސިޔާސީ މަޝްރަހުގެ އަދުގެ ހާލަތާއި، މި ހާލަތުން އަރައިގަތުމަށް ރައްޔިތުންގެ މެދުގައި ޤައުމިއްޔަތު ވަރުގަދަކުރުމުގެ ރޫހެއް އުފެއްދުމަށް އިލްމީ، ފަންނީ އަދި ސިޔާސީ ފަރާތްތައް ގުޅިގެން ކުރެވިދާނެ ކަންކަމަށް އަލިއަޅުއްވާލައްވާނެ ކަމަށް އޭނާ ވިދާޅުވިއެވެ.

ދުންޔާ އާއި އުމަރުގެ އިތުރުން ވެސް، ދެތިން ހަތަރު ބޭފުޅަކު މާދަމާ ރޭގެ އިވެންޓުގައި ވާހަކަ ދެއްކެވުމަށް ހަމަޖެހިފައިވާ ކަމަށް ވެސް އޭނާ ވިދާޅުވިއެވެ.

"މާދަމާ ރޭގެ އިވެންޓުން ވަރަށް ގިނަ ކަންކަން ސާފުވެގެންދާނެ. މި އިވެންޓާ ގުޅޭ ހުރިހާ ކަމެއްހެން މިހާރު ހަމަޖެހި ނިމިފައި ވަނީ."

އިލްމީ، ފަންނީ އަދި ސިޔާސީ ވަރަށް ގިނަ ތަޖުރިބާކާރުން މިހާރު ވެސް ޑީ.އެން.އޭގައި ހަރަކާތްތެރިވަމުން އަންނަ ކަމަށާއި، އެ ހަރަކާތުގައި ބައިވެރިވުމުގެ ދޮރު އާންމުކޮށް ހުޅުވާލައިފައިވާ ކަމަށް ޑީ.އެން.އޭގެ އޮފިޝަލު ވިދާޅުވިއެވެ.

"މި ހަރަކާތާ މެދު ތަފާތު ގޮތްގޮތަށް މީހުން އެބަ ވާހަކަ ދައްކާ. އެކަމަކު މިއީ ވަކި މީހެއްގެ ހަރަކާތެއް ނޫން. ވަކި ކަމަކަށް އަމާޒު ހިފައިގެން ކުރިއަށް ގެންދާ ހަރަކާތެއް ވެސް ނޫން. ގައުމީ އެކިއެކި ކަންކަމުގައި މަޝްވަރާކޮށް، ރައްޔިތުންގެ މެދުގައި ޤައުމިއްޔަތު ވަރުގަދަކުރުމުގެ ރޫހެއް އުފެއްދުމަށް ފަށައިގަންނަ ގައުމީ ހަރަކާތެއް މިއީ. އެހެންވެ މި ކަމުގައި ވީހާ ގިނަ ބައެއްގެ ބައިވެރިވުމާއި އެހީތެރިކަން އަޅުގަނޑުމެން ބޭނުންވޭ."

ޑީ.އެން.އޭގެ ވިސްނުން އުފަންވެގެން، އެކަމާ މަޝްވަރާކުރާތާ ދުވަސްކޮޅެއްވެއްޖެ ކަމަށާއި ޑީ.އެން.އޭގެ ހަރަކާތްތައް ބައްޓަންކުރުމަށްޓަކައި އަގުދުނާމާއެއްގެ ދެލިކޮޕީއެއް ވެސް އެކުލަވާލައި، ލޯގޯއެއް ވެސް ފަރުމާކޮށްފައިވާ ކަމަށް އޭނާ ވިދާޅުވިއެވެ. ނަމަވެސް އަގުދުނާމާ އާއި ލޯގޯ ވެސް ފައިނަލްކުރާނީ، ގިނަ މެމްބަރުންގެ މަޝްވަރާއަށްފަހު ކަމުގައި އޭނާ ވިދާޅުވިއެވެ.

"އިލްމީ، ފަންނީ އަދި ސިޔާސީ ވަރަށް ގިނަ ތަޖުރިބާކާރުން މިހާރު ވެސް އަޅުގަނޑުމެންނާއެކު މަސައްކަތް ކުރައްވަމުން އެބަގެންދަވާ. ވަޒީރުކަން ކުރައްވާފައިވާ ވަރަށް ގިނަ ބޭފުޅުންނާއި އޮފީސްތަކުގެ ވެރިންގެ ފެންވަރުގައި މަސައްކަތް ކުރައްވާފައިވާ އަދި މިހާރުވެސް ކުރައްވަމުން ގެންދަވާ ވަރަށް ގިނަ ބޭފުޅުންނާއި ޕީ.އެޗް.ޑީ ހައްދަވާފައިވާ ވަރަށް ގިނަ ބޭފުޅުންނާއި ވިޔަފާރިވެރިން ވެސް އެބަތިއްބެވި،" ޑީ.އެން.އޭގެ އޮފިޝަލު ވިދާޅުވިއެވެ. "މި ހުރިހާ ބޭފުޅުންގެ މަޝްވަރާގެ މަތިން މާދަމާ ރޭ މި ބާއްވަނީ ޑީ.އެން.އޭ އުފެއްދުމުގެ މަސައްކަތް ފެށިކަން އިއުލާންކުރުމަށް ބާއްވާ ހާއްސަ އިވެންޓެއް. އޭގެ ފަހުން ހަރަކާތްތައް ރާވައި ކުރިއަށް ގެންދާނީ."