ދަރިފުޅާ މި ޙަޔާތަކީ ދަރިފުޅު ނިދަން ތިޔަ އެރި އުނދޯލި
ހަރުއަޑުން ނާނާ ކިޔަން މި ވަގުތު މި މަންމަ މި އިން އުނދޯލި
އޭގެ ބޭނުން މި ހިފެވޭ ގޮތަށާއި ޒާތަށް ވިސްނުމުން
އޭގެ ހާލުގެ ދޫ ޙަޔާތަށް ނަން ދެނީ ހެއްލޭ އުނދޯލި
ކުރި އަރާނީ ބާރުލައި ކޮއްޕައިލެވުނު ވަރަކުން ދެފައިން
ހުރިތަނުން ފައި އުފުލުނަސް ފަހަތަށް ސޮހޭ ވަގުތުން އުނދޯލި
ހަތަރު ބައިން އެ ބަވޭ އެ އިން ބައިނެއް ކެނޑިއްޖެއްޔާ މުޅިން،
ވަތަކުތޯ ޖެހިދާނެ ދަރިފުޅު ވެއްޓި ފުރޮޅައިލައި އުނދޯލި
މާތްވި ދީނާ ޤައުމު، މުޖުތަމަޢާއި ލޮބުވެތި އާއިލާ
ބައިންތަކީ މި ބުނާ ޙަޔާތުގެ ރަމްޒުކޮށްދޭނޭ އުނދޯލި
ލޯބި އިޙްސާނާ ކުލުނު ދިރިއުޅުމުގައި މާތް ރޫޙަކީ
ކޯދުލާ މައިދާނަކީ އެ އަސަރު މި މަންމަގެ ބޮޑު އުނދޯލި
ރީތި އެކި ނާނާތަކާ ބިރުވެރި އިހުގެ ވާހަކަތަކާ
ރީތި އޭގެ ދަރެސް ލިބޭ އެދުރުގެއަކީ ފުރަތަމަ އުނދޯލި
އެންމެ ފުރަތަމަ ހެއްލެނީ އަނެކުންގެ މަދަދުން ލޯބިވެތި،
ދެން އެއަށް ފަހު އުނގެނިގެން ހެއްލަން ޖެހޭނެ ތިމާ އުނދޯލި
މިތުރުނާ އަޚުނާ އުޚުތުނަށް ޖާގަ ދޭން ވެސް ހަމަ ޖެހޭ
ދަތުރުކުރެވޭހޭ އެކަނި، ނުވެވޭނެޔޭ ބުނެޔޭ އުނދޯލި
އެދެވުނަސް މާ ފޮނި އަރާމް ނިންޖެއް އުނދޯލީގައި ނިދާން
ތެދުވެ ވެސް ހެއްލަން ޖެހޭ ފިނި ރޯޅިފަށް ހޯދަން އުނދޯލި
ކަތިކަމެއް ނެތި އަބަދުވެސް ސީދާ ތެދަށް ހެއްލަން ޖެހޭ
މަތިއަރައި ނޫނީ ބޮލަށް އެނބުރުން ގެނޭ ގައިމޭ އުނދޯލި
މަޑުމަޑުން ކަންފަތިވެ ވަސްވަކަރުގެ މަތިން ފަށްތައް އެކީ
އަޑުކިޔައިފައި ވެއްޓިދޭ ކޮންމެސް ދުވަހަކުން ގޮސް އުނދޯލި
