ޚަޔާލުން އުޑުތަކާ ހަމަޔަށް ދަތުރު ކުރަނީ ހެ އިންސާނާ
ވަޔާ އަލި ދޯދިތައް ލަދުގަންނަވައިލައި މިހިރަ މެހުމާނާ
ވިދާ ތަރިތަކުގެ ޢާލަމުގައި ފަޒާ ޖައްވާ ފަލަކުތަކުގައި
ހަނދާނުން ފޮހެލަނީ ހޭ މަންޒިލާ މަޤުޞޫދު ހުންގާނާ
ހަނދާ ހަނދުވަރުގެ ޖާދޫގައި، ނަދާ ޝަބްނަމްގެ މެހެފިލުގައި
ނިދާ މަސްތުގެ އިވޭ ހިނދުގައި ފިދާވެ ދަނީ ހެ ހައި ހޫނާ
ފޮޅޭ މާމަލުގެ ގުލްޝަނުގައި އުޅޭ ބުލްބުލްތަކާއެކުގައި
ކުޅޭ ފިޠުރަތުގެ މިޔުޒިކުގައި ކިޔާ ނަގަނީހެ ތިޔަ ގާނާ
އެއީ ޤުދުރަތުގެ ފުރިހަމަކަން، އެއީ ނިޢުމަތުގެ ތަނަވަސްކަން
އެއާ މެދު ޝުކުރުވެރި ވާން ނޭނގި ދެން ވާން ވީހެ ދީވާނާ
ކޮބައި މި ދަތުރުގެ މަޤުޞަދަކީ، ކޮބައި ބަނދަރާއި ސާހިލަކީ؟
ކޮބައި އެ ކަމަށް ކުރާ ކަމަކީ ޖަވާބެއް ދޭށެ ހައިރާނާ
ހަވާލުވެފައި އޮތީ އާރާސްތު ކުރުމޭ ބިން ނުވިސްނޭހޭ؟
އަވާގައި ޖެއްސި އިރު ތިޔަ ހިތް، ހަވާ ނަފުސާއި ޝައިޠާނާ
އެނގޭ މީހާ ތަފާތު ހެ ސާފު މަގު ދޫކޮށް ހިނގާއިރުގައި؟
މަގޭ 'ލައިލާ' ނެތީމާ މިސްކިތުން ދުވެ ފޭބި މަޖުނޫނާ
ހެވެއް ޢަމަލުން ނުދެއްކެންޏާ، ނަތީޖާއެއް ނުފެންނާނޭ
ނަވެއް ދުވެ ދޭ ހެ ބޯސާގައި، ރިޔާ ކުނބު ހަމަ ވެ، ފަރުމާނާ
