އަހަރެން ގެ ދޭ ތަޢުބީރަކީ ލޯބީގެ ފުން ތަސްވީރެކޭ
އަހަރެން ފުށުން ފެންނާނެނީ ހިނިތުން ވެފައިވާ މޫނެކޭ
ރީތީގެ ހުރިހާ ކުލަވަރެއް ހިބައިން މަށަށް ލިބިފައި ވެޔޭ
ވީތީ މި ނިޢުމަތް އެކުވެރީން ބަލަނީހަސަދަވެރި ބެލުމެކޭ
ފޮންޏޭ މަގޭ މުޅި ދިރިއުޅުން ވައިފަނުގެ ހުރި ތާޒާ ގުޅުން
ފިންޏާއި ހޫނަށް ހޭނުމީ އަހަރެން ގެ ހުންނަ މިޒާޖެކޭ
ބައްދަލުވެލާ ހިނދުގާ މަށާ އޭނާ ގެ ހިތް ހަދިޔާ ވެޔޭ
ރައްދު ގެ ގޮތުން މިހިތުގެ ވަފާ ދިނުމީ މަށަށް އޮތް އުފަލެކޭ
ކަތިނަޒަރަކުން ނަމަވެސް ލޮލާ ސީދާވި ނަމަ އޭނާ ގެ ލޯ
ކަތިވާނެޔޭ އެ ހިތާ މެޔާ ނުފިލާނެ އޭ ފުން ޒަޚަމެކޭ
ސީދާ ސަރާސަރު މަގުމަތީން ބައްޓަން ވެފައިވާ އުޅުމަކަށް
ސީދާ އިތުރު އަލިކަން ލިބޭ ތާއީދަކީ އީމާނެކޭ
އަހަރެން ގެ ހިތުގައި ނޯވެޔޭ އަނެކާ ގެ މައްޗަށް ނަފުރަތެއް
އަހަރެން ގެ ޙުރުމަތް ދަންނަ ނަމަ ލިބިދޭ އެއީ އިންސާފެކޭ
ގުޅިގެން އުޅެން ބޭނުން ވިއަސް ދަންނަން ތިބާ ލާޒިމު ވެޔޭ
ގުޅިފައި ހިތާ އަހަރެން ގެ ވާ ޖަޒުބާތަކީ އޮތް ޙައްޤެކޭ
ފަތުރާ ބަހުރުހިންދު ގެ މަތީ އަތުރާލެވުނު ފެހި މުތްތަކީ
ފިޠުރަތުގެ ހަދިޔާ ސިފަ ކުރާ ފިނިފެންމަލުގެ ތަޢުރީފެކޭ
