ބޯޑަރުގައި އިއްޔެ މައިނެއް ގޮވައި ސިފައިންތަކެއް ޒަހަމްވުމާ ގުޅިގެން ކެމްބޯޑިއާއާއެކުވި ސުލްހައިގެ އެއްބަސްވުމަށް އަމަލު ކުރުން ސަސްޕެންޑްކޮށްފި ކަމަށް ތައިލެންޑުން ބުނެފިއެވެ.
"އަހަރެމެން ކުރިން ހީކުރި ގޮތާ ހިލާފަށް އަހަރެމެންގެ ގައުމީ ސަލާމަތަށް އޮތް ދުޝްމިންކަން ވަކި ދަށެއް ނުވޭ،" ތައިލެންޑްގެ ބޮޑުވަޒީރު އެނުޓިން ޗަރްނުވިރަކުލް ވިދާޅުވިއެވެ.
ތައިލެންޑްގެ އަސްކަރިއްޔާއިން ބުނީ ކެމްބޯޑިއާއާއެކު ވެފައިވާ ހުރިހާ އެއްބަސްވުންތަކެއް ތަންފީޒުކުރުން މަޑުޖައްސައިލައިފި ކަމަށެވެ.
"ކެމްބޯޑިއާއިން އެ ގައުމުގެ ދުޝްމިންކަން ނައްތައިލައިފިކަން ސާފު އިހްލާސްތެރިކަމަކާއެކު ދައްކަންދެން ކެމްބޯޑިއާއާއެކުވި ހުރިހާ އެއްބަސްވުންތަކެއް މަޑުޖައްސައިލައިފިން،" ތައިލެންޑްގެ އަސްކަރިއްޔާއިން ބުންޏެވެ.
ކެމްބޯޑިއާއިން ބުނީ އައު މައިންތަކެއް ވަޅު ނުލައި ކަމަށެވެ.
"މިހާރު ފެންނަމުންދާ މައިންތަކަކީ ކުރިން ހިނގައިފައިވާ ހަމަނުޖެހުންތަކުގައި ވަޅުލި މައިންތަކެއް،" ކެމްބޯޑިއާގެ އޮފިޝަލަކު ބުންޏެވެ.
ކެމްބޯޑިއާއާއެކު ތައިލެންޑުން ސުލްހައިގެ އެއްބަސްވުމެއް ގާއިމު ކުރީ މިދިޔަ މަހު 26 ގައި އެމެރިކާގެ ރައީސް ޑޮނަލްޑް ޓްރަމްޕްގެ ބެއްލެވުމުގެ ދަށުންނެވެ. އެއީ ޖުލައި މަހު ކެމްބޯޑިއާ އާއި ތައިލެންޑްގެ ބޯޑަރުގައި މީހުންގެ ފުރާނަ ދިޔަ ހަމަލާތަކެއް ބަދަލު ކުރުމާ ގުޅިގެންނެވެ.
advertisment
