އެމްއެމްޕީއާރްސީގެ މައްސަލާގައި ކުރީގެ ރައީސް އަބްދުﷲ ޔާމީން އަބްދުލްގައްޔޫމުގެ މައްޗަށް އުފުލާފައިވާ ދައުވާތަކަކީ ބާތިލް ދައުވާތަކެއް ކަމުގައި އިދިކޮޅު ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވެއްޖެއެވެ.

އަބުދުއްރަހީމް މިއަދު ކުރެއްވި ޓްވީޓެއްގައި ވިދާޅުވީ ޕްރޮސިކުޓަރ ޖެނެރަލަކަށް ހުސައިން ޝަމީމް ހުންނަވައިގެން އެމްއެމްޕީއާރްސީއާ ގުޅިގެން އުފުލާފައިވާ ކޮންމެ ދައުވާއެއް ވާނީ ބާތިލް ދައުވާއެއް ކަމަށެވެ.

"ސަބަބަކީ އެމްއެމްޕީއާރްސީ މައްސަލާގައި އަދީބާއި ޒިޔަތުގެ ވަކީލަކީ ޝަމީމް. އެހެންވީމާ ރައީސް ޔާމީންގެ މައްޗަށް އުފުލައިފައިވާ ދައުވާތައް ވަނީ ބާތިލް ދައުވާތަކަކަށް،" ޕީއެންސީގެ ރައީސް ވިދާޅުވިއެވެ.

ޕީޖީ އަކަށްޝަމީމު ހުރެގެން އެމް.އެމް.ޕީ.އާރު.ސީ އާ ގުޅިގެން އުފުލައި ކޮންމެ ދައުވާއެއް ވާނީ ބާތިލް ދަޢުވާއަކަށް.ސަބަބަކީ އެމް.އެމް.ޕީ.އާރު.ސީ މަސްއަލައިގައި އަދީބާ ޒިޔަތުގެ ވަކީލަކީ ޝަމީމް.އެހެންވީމާ ރައީސް ޔާމީނުގެ މައްޗަށް އުފުލާފައިވާ ދަޢުވާތައް ވާނީ ބާތިލް ދަޢުވާ ތަކަކަށް.

— Abdul Raheem Abdulla (@Banafsaa) August 14, 2020

މަނީ ލޯންޑްރިންގެ ކުށުގައި މިހާރުވެސް ފަސް އަހަރުގެ ޖަލުހުކުމެއް ތަންފީޒު ކުރައްވަމުން ގެންދަވާ ރައީސް ޔާމީންގެ މައްޗަށް އިތުރު ދަޢުވާތަކެއް ކުރުމަށް ޕްރޮސިކިއުޓަރ ޖެނެރަލް އޮފީހުން ވަނީ ކްރިމިނަލް ކޯޓަށް މައްސަލަ ފޮނުވަފާއެވެ. މި މައްސަލަތަކުގެ އަޑުއެހުން މި އަންނަ އާދިއްތަ ދުވަހަށް ވަނީ ތާވަލްކޮށްފައެވެ.

މިިދިޔަ އަހަރުގެ ނޮވެމްބަރުމަހުގެ ތެރޭގައި ރައީސް ޔާމީން ފަސް އަހަރަށް ޖަލަށްލުމަށާއި ފަސް މިލިއަން ޑޮލަރުން ޖޫރިމަނާކުރުމަށް ކްރިމިނަލް ކޯޓުން ކުރި ހުކުމުގެ އިސްތިއުނާފް ޝަރީއަތް ހައިކޯޓުގައި ދަނީ ހިނގަމުންނެވެ.