ކުރީގެ ރައީސް މުޙައްމަދު ނަޝީދު މިދިޔަ ބުދަ ދުވަހު "ސަންގު ޓީވީ" މެދުވެރިކޮށް ރައްޔިތުންނާ މުޚާތަބު ކުރެއްވިއެވެ. ބޭނުމަކީ އެމްޑީޕީން އެއިރު ރާވަމުންދިޔަ "ވަޒީފާ ބުރާސްފަތި" މުޒާހަރާތަކާ ގުޅޭގޮތުން އާންމުންގެ ހިތްތަކުގައި ހުރި ސުވާލުތަކަށް ޖަވާބުދެއްވައި، ހަމަޖެހުން ގާއިމުކުރެއްވުން ކަމަށް ބެލެވުނެވެ.

އެމްޑީޕީގެ އަލަށް އިންތިޚާބުވެވަޑައިގަތް ޗެއަރޕާސަންގެ ހައިސިއްޔަތުން ނަޝީދު ސާފުކޮށް ވިދާޅުވީ، އެ މުޒާހަރާތަކަކީ ސަރުކާރު ވައްޓާލުމަށް، ނުވަތަ ހަމަނުޖެހުން ހިންގައި ދައުލަތުގެ މުއައްސަސާތަކަށް ވެރިވެގަތުމަށް ކުރާ ކަމެއް ނޫން ކަމަށެވެ. އޭގެ ބަދަލުގައި، އެއީ ކުންފުނިތަކުން ބޭއިންސާފުން ވަޒީފާއިން ވަކިކުރި މުވައްޒަފުންގެ ދިފާއުގައި، ގާނޫނުއަސާސީން ލިބިދޭ ހައްގުގެ ބޭނުން ހިފައިގެން ބާއްވާ ސުލްހަވެރި ހަރަކާތެއްގެ ގޮތުގައި ނަޝީދު ސިފަކުރެއްވިއެވެ. އަދި މަގުތަކުގެ ޓްރެފިކް ބެލެހެއްޓުމަށް ފުލުހުންނަށް އިލްތިމާސްކުރައްވައި، ޑިމޮކްރެޓިކް ނިޒާމުގެ ތެރެއިން މަސައްކަތްކުރައްވާ، ޒިންމާދާރު ސިޔާސީ ލީޑަރެއްގެ ސޫރަ ދެއްކެވުމަށް ނަޝީދު މަސައްކަތް ކުރެއްވިއެވެ.

ނަމަވެސް، އެމަނިކުފާނު ދެއްކެވި ސުލްހަވެރި ވާހަކަފުޅަކީ ހަމައެކަނި ބޭރުފުށުގެ މާސްކެއްކަން މިއަދު މިވަނީ ސާފުވެފައެވެ. ރޭ ނަޝީދު އެކްސްގައި ކުރެއްވި ހަރުކަށި ޕޯސްޓަކާއެކު، މުޅި ގައުމު އަނެއްކާވެސް މިވަނީ ހަލަބޮލިކަމެއްގެ ތެރެއަށް ވައްޓާލައްވައިފައެވެ. ސްޓެލްކޯގެ އިންޖިނިއަރެއް ކަމަށްވާ މުހައްމަދު މާސިހު އެމްޑީޕީގެ ހަރަކާތްތަކުގައި އުޅޭތީ ވަޒީފާއިން ވަކިކުރި ކަމަށް ވިދާޅުވެ، ނަޝީދު ވަނީ "ރައީސް މުއިއްޒު މި ރާއްޖެ ތިޔަ ގެންދަވަނީ އިންގިލާބުގެ ތުންފަތްމައްޗަށް" ކަމަށް ވިދާޅުވެ، ސީދާ އިންގިލާބެއްގެ އިންޒާރު ތަކުރާރު ކުރައްވައިފައެވެ. އަދި ރައީސް މުއިއްޒަކީ "މަގުބޫލުކަން ގެއްލިފައިވާ" ވެރިއެއްގެ ގޮތުގައި ސިފަކުރައްވައި، އެމްޑީޕީން މި ވެރިކަން ނިމުމަކަށް ގެންނާނެ ކަމަށް ވިދާޅުވެ، ބަޣާވާތެއްގެ ރޫހު ނަޝީދު ވަރަށް ފާޅުގައި ދެއްކެވިއެވެ.

މިއީ ޖޫން މަހުގެ ކުރީކޮޅުން ފެށިގެން ނަޝީދު ގެންގުޅުއްވާ ހަރުކަށި ބަސްމަގުގެ ސިލްސިލާގެ ބޮޅެކެވެ. މީގެ ކުރިން ޖޫން 8 ގައިވެސް ނަޝީދު ވަނީ މުޒާހަރާތަކުން ހައްޔަރުކުރި އެމްޑީޕީ މެންބަރުންނަށް ދައުވާކޮށްފިނަމަ ސަރުކާރު "5 އިންސައްތައަށް ތިރިކޮށްލާނެ" ކަމަށް ވިދާޅުވެ ސަރުކާރަށް އިންޒާރު ދެއްވައިފައެވެ. އަދި އެމްޑީޕީއަށްވުރެ މައްޗަށް ރައީސް މުއިއްޒަށް ނޭރުއްވޭނެ ކަމަށްވެސް އެ ދުވަހު ނަޝީދު ވިދާޅުވިއެވެ.

އަދި ޖޫން 18 ވީ ބުރާސްފަތި ދުވަހު އެމްޑީޕީން ބޭއްވި ރެލީގައިވެސް ނަޝީދު ވަނީ ރައީސް މުއިއްޒު "އިންގިލާބެއް" އުފައްދަވަމުން ގެންދަވާ ކަމަށާއި، މުވައްޒަފުން ވަޒީފާއިން ވަކިކުރުމާ ދެކޮޅަށް ދިވެހި ރައްޔިތުން ތެދުވާނެ ކަމަށް ވިދާޅުވެފައެވެ. މި އެއްވުމުގައި ޕާޓީގެ ރައީސް ޢަބްދުﷲ ޝާހިދުވެސް ބައިވެރިވެވަޑައިގެން، ސަރުކާރު "ކޮށިވެފައި"ވާ ކަމަށް ވިދާޅުވިއިރު، ނަޝީދުގެ މި ރޫޅުންތެރި ބަސްމަގަކީ ކުރިން ޓީވީގައި ދެއްކެވި ސުލްހަވެރި ވާހަކަތަކާ ދިމާ އިދިކޮޅު ވާހަކަތަކެކެވެ. އެމްޑީޕީން ބުނާ ގޮތުގައި އެ ޕާޓީއަށް ނިސްބަތްވާ 80 އަށްވުރެ ގިނަ މުވައްޒަފުން ވަނީ ސަރުކާރު ވަޒީފާތަކުން ވަކިކޮށްފައެވެ. ނަމަވެސް، ގާނޫނީ ގޮތުން ޓްރައިބިއުނަލަށް މައްސަލަ ހުށަހަޅައިގެން ކުރިއަށްދާން އޮތް ފުރުސަތު ދޫކޮށްލައްވައި، ނަޝީދު ގައުމު "އިންގިލާބެއްގެ ތުންފަތްމައްޗަށް" ކޮއްޕާލައްވަން މަސައްކަތް ކުރެއްވުމަކީ ޤައުމު މިހާރު އޮތް ނާޒުކު ހާލަތަށް ބަލާއިރު ގައިރު ޒިއްމާދާރު، ބިރުވެރި ކަމެކެވެ.

ނަޝީދުގެ ސަޕޯޓަރުން ވަނީ މި ދެފުށް ދެގޮތް ވާހަކަތަކުގެ ދިފާއުގައި ތެދުވެފައެވެ. އެމީހުން ބުނާ ގޮތުގައި ނަޝީދު އިލްތިމާސް ކުރެއްވީ އިންގިލާބަކަށް ނޫނެވެ؛ އެއީ ގައުމުގެ ހާލަތު ދާގޮތުން ވެދާނެ ގޮތެއްގެ "ތަސައްވުރެއް" ނުވަތަ ލަފާކުރެއްވުމެކެވެ. ނަމަވެސް ސިޔާސީ މަސްރަހަކީ ހަމައެކަނި ލަފްޒުތަކުގެ މާނައިން ރެކެން ކުޅޭ ކުޅިވަރެއް ނޫނެވެ. އެއީ އިޝާރާތްތަކާއި، އޭގެ ނުސީދާ މާނަތަކާއި، އޭގެން ނުކުންނާނެ ނަތީޖާގެ ހިސާބު ވެސް ޖަހައިގެން ކުޅޭ ކުޅިވަރެކެވެ. ސިޔާސީ ލީޑަރަކު ޓީވީގައި ގައުމުގެ ހަމަޖެހުމަށް ވަކާލާތު ކުރެއްވުމަށްފަހު، ސޯޝަލް މީޑިއާއަށާއި މަގުމައްޗަށް ނުކުމެ ސަރުކާރު ނައްތާލުމުގެ ނުވަތަ އިންގިލާބެއްގެ ބިރުވެރިކަން ދެއްކުމުން، އާންމު ރައްޔިތުންނަށް ގަބޫލުކުރަން މަޖުބޫރުވަނީ ހިތްދަތި ހަގީގަތެކެވެ.

މިއީ ނަޝީދުގެ ސިޔާސީ ހަޔާތުގައި ފެނުނު ފުރަތަމަ "ދެ ދުލުގެ" ސިޔާސަތެއް ނޫނެވެ. މިއީ ނަޝީދު އާއްމު ގޮތެއްގައި ބޭނުން ކުރައްވާ ސިޔާސީ އުކުޅެކެވެ. އެއްފަހަރާ ގިނަ ރިވާޔަތްތަކެއް ދަމަހައްޓަވައި، ފަހުން ފާޑުކިޔުން އަމާޒުވުން ރެކިވަޑައިގަނެވޭނެ ފަދަ ދޮރުތަކެއް ނަޝީދު އަބަދުވެސް ހުޅުވައިފައި ބަހައްޓަވައެވެ.

އޮޅުންބޮޅުން ބޮޑު ސިޔާސަތު

އެމްޑީޕީގެ އެތެރޭގެ މަސްރަހުން ދާދި ފަހުން ފެނުނު ކަންކަމަކީ މީގެ ހެކިތަކެކެވެ. އެމްޑީޕީގެ ޗެއަރޕާސަންގެ މަގާމަށް ނަޝީދު އިންތިޚާބުވުމާ ގުޅިގެން، އެމަނިކުފާނުގެ "ބޮޑު ބަދަލު" ހަރަކާތާ ގުޅުން ހުރި ވަޓްސްއަޕް ގްރޫޕެއްގައި ހޫނު ބަހުސެއް ހިނގިއެވެ. ކުރިއަށް އޮތް ރިޔާސީ އިންތިޚާބުގައި ވާދަނުކުރައްވާނެ ކަމަށާއި ފައްޔާޒް އިސްމާއީލަށް ތާއީދުކުރައްވާނެ ކަމަށް ނަޝީދު ފާޅުގައި ވިދާޅުވެފައިވީ ނަމަވެސް، އެމަނިކުފާނުގެ ސަޕޯޓަރުން ދަނީ 2028 ގެ އިންތިޚާބުގައި ނަޝީދު ނިކުމެވަޑައިގަތުމަށް ފާޅުގައި ގޮވާލަމުންނެވެ.

އެމްޑީޕީގެ ބައެއް މެންބަރުން ބުނާ ގޮތުގައި ނަޝީދުގެ ވެރިކަން "ޣައިރު ގާނޫނީ" ބަޣާވާތަކުން ވައްޓާލާފައިވާތީ، ގައުމުގެ ވެރިކަން ކުރުމުގެ ދެވަނަ ފުރުސަތެއް އެމަނިކުފާނަށް ހައްގެވެ.

އަދި، އެމްޑީޕީއަށް ވެރިކަން އަލުން ހޯދައިދެއްވޭނީ ފައްޔާޒަކަށް ނުވަތަ އާ ޖީލެއްގެ ލީޑަރަކަށްވެސް ނޫން ކަމަށާއި، އެކަން ކުރެވޭނީ ހަމައެކަނި ނަޝީދަށް ކަމަށް އެފަދަ ސަޕޯޓަރުން ދަނީ ބުނަމުންނެވެ. މި ބަހުސުން އެނގިގެންދަނީ، ޕާޓީގެ ކުރިމަގު ވަކި ފަރުދެއްގެ ވަށައިގެން އެނބުރޭ ސިޔާސަތުން ބޭރުވާން ބޭނުންނުވާ މެމްބަރުން އަދިވެސް އެ ޕާޓީތެރޭގައި ގިނަ ކަމެވެ. ބައެއް މެމްބަރުން ޕާޓީގެ އެއްބައިވަންތަކަމަށާއި، ޤައުމަށް ދިމާވެފައިވާ ތަކެތީގެ އަގުބޮޑުވުމާއި، ކަރަންޓު ބިލްތައް ބޮޑުވުމާއި، ވަޒީފާ ނެތް މީހުން ގިނަވުމުގެ މައްސަލަތަކާއި، ރައްޔިތުންގެ ތަކުލީފުތަކަށް ސަމާލުކަން ދިނުމަށް ގޮވާލި ނަމަވެސް، އަނެއްބައި މެމްބަރުން އަދިވެސް މަސައްކަތް ކުރަނީ އެމްޑީޕީގެ ކުރިމަގަކީ ނަޝީދުގެ އެނބުރި އައުން ކަމަށް ހެދުމަށެވެ.

މި ބަހުސުން ހާމަވާ އެންމެ މުހިންމު ކަމަކީ ނަޝީދު ރިޔާސީ ރޭހަށް ނުކުންނަވާނެ ކަމަށް އިއުލާނު ކުރެއްވުމެއް ނޫނެވެ. އެމަނިކުފާނު އެފަދަ އިއުލާނެއް އަދި ނުކުރައްވައެވެ. ނަމަވެސް، މި ބަހުސުން ހާމަވާ އެންމެ މުހިންމު ކަމަކީ، ބޭރުފުށުން ފައްޔާޒަށް ތާއީދުކުރައްވާ ކަމަށް ނަޝީދު ދެއްކެވި ނަމަވެސް، އެމަނިކުފާނުގެ ސަޕޯޓަރުންގެ ސިޔާސީ ޖޯޝް އަދިވެސް ދެމިއޮތީ ނަޝީދު އެނބުރި ވަޑައިގަންނަވާނެ ކަމުގެ އުންމީދުގެ މައްޗަށް ކަމެވެ.

މިއީ ނަޝީދުގެ ސިޔާސީ އުކުޅުތަކުގެ ފޮތުގައި، ޒިންމާއިން ރެކުމުގެ ފުރުސަތު ހޯއްދަވާ ގޮތެވެ. ނަޝީދު އަމިއްލައަށް އެއްވެސް އެދުމެއް އެދިވަޑައެއްނުގަނެއެވެ. އެހެން މީހުން ލައްވައި އެދެނީއެވެ. އޭރުން އެފަދަ މީހުންގެ ޚިޔާލު އާންމުންގެ ތެރެއަށް ފެތުރި، ބާރުގަދަވެ، ރައްޔިތުންގެ ޝުއޫރުތައް ޓެސްޓުކުރެވެއެވެ.

ގާނޫނީ ކެތްތެރިކަމެއް ނެތުން އަދި އަމިއްލަ އެދުން

ނަޝީދު އެމްޑީޕީގެ ޗެއާ ޕާސަން ކަމަށް އެނބުރި ވަޑައިގަތް ފަހުން ނަޝީދުގެ މި ސިޔާސީ އުކުޅު ވަނީ އިތުރަށް ފާޅުވެފައެވެ.

ވާދަވެރި އެތެރޭގެ އިންތިޚާބަކަށްފަހު، ޖޫން 12 ގައި ޗެއަރޕާސަންކަން ކަށަވަރު ކުރެއްވުމާއެކު، އާޓިފިޝަލް ބީޗުގައި ބޭއްވި ކާމިޔާބީގެ ފާހަގަކުރުމުގެ އެއްވުމުގައި ނަޝީދު ވަނީ ވަރަށް ވަރުގަދަ އިންޒާރުތަކެއް ސަރުކާރަށް ދެއްވައިފައެވެ. ވަޒީފާއިން ވަކިކުރާ މުވައްޒަފުންގެ މައްސަލަ ހައްލުނުކޮށްފިނަމަ، މާލޭގައި ހުރި ސަރުކާރު ކުންފުނިތަކުގެ ހެޑް އޮފީސްތައް "އޮކިއުޕައި"ކޮށް ސީދާ ހަރަކާތަށް ނުކުންނާނެ ކަމުގެ އިންޒާރު އެ ރޭ އެމަނިކުފާނު ދެއްވިއެވެ. އަދި ހަމަ އެ ރޭ، "ސަރުކާރު ބަދަލު ކުރުމުގެ މަސައްކަތް" ފެށުމަށްޓަކައި ހުރިހާ ސިޔާސީ ވާދަވެރިންނަށް އެކުގައި މަސައްކަތް ކުރުމަށް ފާޅުގައި ދައުވަތު ދެއްވިއެވެ. މި ހޫނު ބަސްމަގަށްފަހު، ނަޝީދު ވަނީ ރައްޔިތުންގެ ސަމާލުކަން ގާނޫނުއަސާސީ ބަދަލުކުރުމުގެ މިސްރާބަށް އަނބުރާލައްވާފައެވެ.

އެމަނިކުފާނު ވަކާލާތު ކުރައްވަނީ ދައުލަތުގެ ވެރިޔާއާއި ސަރުކާރުގެ ވެރިޔާގެ މަގާމު ވަކިކުރުމަށެވެ. އަދި އެ އިސްލާހުތައް 2028 އާ ހަމައަށް މަޑުނުކޮށް، މިހާރުން މިހާރަށް ގެންނަންޖެހޭ ކަމަށް ނަޝީދު ގެންދަވަނީ ވިދާޅުވަމުންނެވެ.

ޗެއާޕާސަންގެ އިންތިހާބުގެ ކެމްޕޭންތެރޭގައި ނަޝީދާއި ފައްޔާޒު ވިދާޅުވެފައިވަނީ 2028 ގައި ސަރުކާރު ހިންގާ ވެރިއަކަށް (ރިއާސީ އިންތިހާބަށް) ފައްޔާޒު ނެރެ، ދައުލަތުގެ ވެރިއަކަށް ނަޝީދު ޝައުގުވެރިވާ ކަމަށެވެ. އަދި ދައުލަތުގެ ވެރިޔާ ހޮވާނީ ރައްޔިތުންގެ ސީދާ ވޯޓަކުން ނޫން ކަމަށާއި، އެ މަގާމަށް މީހަކު ހޮވާނީ ރައްޔިތުންގެ މަޖިލީހުން ކަމަށް ނަޝީދު ހުށަހަޅުއްވާފައި ވެއެވެ.

ގަސްދުގައި ވިޔަސް ނުވަތަ ނޭނގި ނަމަވެސް، މި ހުށަހަޅުންތަކުން ސުވާލުތަކެއް އުފެދެއެވެ. މިހާ އަވަސް އަރުވާލަންވީ ކީއްވެގެން ހެއްޔެވެ؟ އަދި ގައުމުގެ އެންމެ މަތީ މަގާމު ހޮވުމުގައި ރައްޔިތުންގެ ސީދާ ބައިވެރިވުން ކުޑަކުރާ ފަދަ އިސްލާހުތަކަކަށް ވަކާލާތު ކުރައްވަނީ ކީއްވެގެން ހެއްޔެވެ؟ ފާޑުކިޔާ މީހުންގެ ޖަވާބު ސާފެވެ: މިއީ ނަޝީދާއި އެމަނިކުފާނުގެ ބައިވެރިންނަށް އަލުން ވެރިކަމުގެ ބާރުތަކަށް ވާސިލުވުމަށް ކޮށާ އާ ސިޔާސީ މަގެކެވެ.

މަސްރަހު ދިރާސާ ކުރާ ބައެއް ފަރާތްތަކުން ދެކޭ ގޮތުގައި، 2028 ގެ ކުރިން ރައީސް ނަޝީދު ފައްޔާޒުވެސް ނަގާ އެއްލަވައިލައްވާނެއެވެ. އާޚިރުގައި ރިއާސީ އިންތިހާބަށް ނިކުމެވަޑައިގަންނަވާނީ ވެސް، އެފަދަ މުރާސިލުންގެ ނަޒަރުގައި، ޚުދު ނަޝީދެވެ.

ބައިބައިވުމުގެ ތާރީޚެއް

ނަޝީދުގެ ދިފާއުގައި ވާހަކަދައްކާ މީހުން އެމަނިކުފާނަކީ މުއައްސަސާތަކަށް ގޮންޖައްސަވާ، އުސޫލުތަކަށް ވަކާލާތުކުރައްވާ އިސްލާހީ ރީފޯމަރެއްގެ ގޮތުގައި ސިފަކުރެއެވެ. ނަމަވެސް ފާޑުކިޔާ މީހުންނަށް ފެންނަނީ ތަފާތު މަންޒަރެކެވެ: އެފަދަ މީހުންނަށް ފެންނަ ގޮތުގައި ނަޝީދަކީ މުއައްސަސާތަކުގެ ހަމަޖެހުމަށްވުރެ އަމިއްލަ ސިޔާސީ ކުރިއެރުމަށް އިސްކަންދެއްވާ ސިޔާސީ ބޭފުޅެކެވެ. މިގޮތަށް ޕާޓީން ވަކިވުމާއި، އެނބުރި އައުމާއި، ނިޒާމު ބަދަލުކުރުމާއި، ވަކި މީހެއްގެ ވަށައިގެން އެނބުރޭ ސިޔާސީ ކުޅިވަރުތަކުން އުފެދޭ ބޮޑު ސުވާލަކީ މިއެވެ: ނަޝީދުގެ މަގްސަދަކީ ދައުލަތުގެ މުއައްސަސާތައް ވަރުގަދަކުރުން ހެއްޔެވެ؟ ނުވަތަ ސިޔާސީ ހުރިހާ ބާރެއް އަބަދުވެސް ވަކި ފަރުދެއްގެ މުށުތެރޭގައި ބޭއްވުން ހެއްޔެވެ؟

ނާޒުކު އިގްތިސާދެއްގައި ޒިންމާދާރުކަމެއް ނެތް ބަސްމަގު

މަގުތަކަށް ނިކުމެ މުޒާހަރާކުރުމަކީ ޒިންމާދާރުކަމާއެކު ކުރާނަމަ ޑިމޮކްރެޓިކް ނިޒާމެއްގައި ކުރެވޭނެ ކަމެކެވެ. ނަމަވެސް، ކޮންމެ ސިޔާސީ ޚިޔާލުތަފާތުވުމެއް، ގައުމީ ސަލާމަތުގެ ބޮޑު ހަނގުރާމައަކަށް ހަދައިގެން، "ސަރުކާރު 5 ޕަސެންޓަށް ތިރިކޮށްލާނެ" ކަމަށް ބުނެ، ނުވަތަ ގައުމު "އިންގިލާބުގެ ތުންފަތްމައްޗަށް" ގޮސްފައިވާ ކަމަށް ބުނެ ބިރުވެރިކަން އުފެއްދުމުން އޭގެ ނޭދެވޭ އަސަރު މުޅި ގައުމަށާއި ހުރިހާ ރައްޔިތުންނަށް ކުރެއެވެ. ދިވެހިރާއްޖޭގެ އިގްތިސާދު މިވަގުތު އޮތީ ވަރަށްވެސް ނާޒުކު ފައްތަރެއްގައެވެ. ދައުލަތުގެ ދަރަނީގެ ބުރަ އިތިހާއަށް އެބައޮތެވެ. އިންވެސްޓަރުންގެ އިތުރުބާރު ހިފެހެއްޓުމަކީ ކޮންމެހެން ކުރަން ޖެހިފައިވާ ކަމެކެވެ. ރާއްޖޭގެ އިގްތިސާދުގެ ލޭނާރު ކަމުގައިވާ ފަތުރުވެރިކަން އޮތީ މެދުއިރުމަތީގެ ހަނގުރާމައާ ގުޅިގެން ނޭވާހޮޅިއަށް އެޅިފައެވެ. މިފަދަ ހާލަތެއްގައި އޮތް ގައުމެއްގައި، "އިންގިލާބު" ތަކާއި، ސަރުކާރު ނައްތާލުމުގެ ބަސްމަގުތަކާއި، މަގުމަތީގެ ކުރިމަތިލުންތަކުގެ ވާހަކަ ދެއްކުމަކީ ހަމައެކަނި ސިޔާސީ ދާއިރާއަށްވުރެ މާ ފުނަށް އޭގެ ނޭދެވޭ އަސަރު ފޯރާނެ ކަންކަމެވެ. މިފަދަ ބަސްމަގުން ނަޝީދުގެ ސަޕޯޓަރުންނަށް ޖޯޝު ގެނުވި ނަމަވެސް، މިއީ ވިޔަފާރިތަކަށާއި ބޭރުގެ ބައިވެރިންނަށާއި ގައުމުގެ ހަމަޖެހުމަށް ބޭނުންވެފައި ތިބި އާންމު ރައްޔިތުންނަށް ނަޝީދު ގަސްތުގައި ދެއްވާ ވަރަށް ނުރައްކާތެރި މެސެޖެކެވެ. ބޭނުމަކީ ޤައުމު ހަލަބޮލިކޮށް، ސަރުކާރު ބަލިކަށިކޮށް، ހައިޖާނެއްގެ ތެރެއިން ވެރިކަމުގެ ބާރުތައް ހޯއްދެވުމެވެ.

ސިޔާސީ ލީޑަރުންނަށް ސަރުކާރަށް ފާޑުކިޔުމުގެ ހައްގު އޮންނާނެއެވެ. މުޒާހަރާ ރޭވުމުގެ ހައްގުވެސް އޮންނާނެއެވެ. ނަމަވެސް އެ ހައްގުތަކާއެކު، އިގްތިސާދީ ގޮތުން ނާޒުކު ހާލަތުގައި އޮތް ގައުމެއްގައި ބޭކާރު ހަލަބޮލިކަމާއި ބިރުވެރިކަން ނުއުފެއްދުމުގެ ޒިންމާވެސް އިދިކޮޅު ވެރިން ނަންގަވަން ޖެހެއެވެ.

ނިންމުން

ދިވެހީންނަށް ޑިމޮކްރެޓިކް ފުރުސަތުތައް ފަހިކޮށްދިނުމުގައި، އެތައް ބަޔަކާ ގުޅިވަޑައިގެން ނަޝީދު އަދާކުރެއްވި ދައުރަކީ ދެބަސްވެވެން ނެތް ހަގީގަތެކެވެ. ރާއްޖޭގެ ސިޔާސީ ތާރީޚުން އެމަނިކުފާނުގެ މަގާމު ވަނީ ކަށަވަރުވެފައެވެ. ނަމަވެސް މާޒީގެ ކާމިޔާބީތަކަކީ އެއްވެސް ލީޑަރަކު އަނބުރާ ބާރުތައް ހޯއްދަވަން ޤައުމު ޤުރުބާން ކުރައްވާއިރު، ފާޑުކިޔުންތަކުން ބަރީއަވާން އަބަދު ބޭނުން ކުރެވޭނެ އައްޑަނައެއް ނޫނެވެ.

މިއަދު ރާއްޖެއަށް ކުރިމަތިވެފައިވާ ގޮންޖެހުމަކީ ޑިމޮކްރަސީއެއް "އުފެއްދުމެއް" ނޫނެވެ. މިވަގުތު ކުރަން ޖެހިފައިވާ ކަމަކީ އުފެދިފައިވާ ޑިމޮކްރަސީ "ވަރުގަދަކޮށް ދެމެހެއްޓުމެވެ." އެކަމަށް ބޭނުންވަނީ ވަރުގަދަ މުއައްސަސާތަކާއި، ސިޔާސީ ގޮތުން ރައްޔިތުންނާއި ވެރީން ފައްކާވުމާއި، ވަކި ފަރުދެއްގެ ވަށައިގެން އެނބުރޭ ސިޔާސަތު ދޫކޮށްލުމުގެ ހިތްވަރެވެ. ހަމަޖެހުމާއި، އިގްތިސާދީ ކުރިއެރުމާއި، މުއައްސަސާތަކުގެ ވަރުގަދަކަމަށް ބޭނުންވެފައިވާ ގައުމަކަށް، އަބަދު ހަލަބޮލިކަމުގެ ތެރޭގައި އޮތުމުގެ ސިޔާސަތަކީ ކުރިއަށްދާން އޮތް ދެމެހެއްޓެނިވި މަގެއް ނޫނެވެ. ހުރިހާ ވާދަވެރިން ގުޅިގެން ސަރުކާރު ވައްޓާލަން ނުވަތަ "5 ޕަސެންޓަށް ސަރުކާރު ތިރިކޮށްލަން" ނުވަތަ ގައުމު "އިންގިލާބެއްގެ ތުންފަތްމައްޗަށް" ގެންދަވާނެ ކަމަށް ވިދާޅުވެ ނަޝީދު ގޮވާލައްވާ ގޮވެލިފަތިން އެނގެނީ، އެކްޓިވިސްޓް އާދަތައް ނޫން އުކުޅެއް އަދިވެސް ނަޝީދަށް އެގިވަޑައިނުގަންނަވާ ކަމެވެ.