ރައްޔިތުންގެ ސުވާލުތަކަށް ސީދާ ޖަވާބު ދެއްވުމަށް ސަރުކާރުން ކުރިއަށްގެންދަވާ "އަހާ" ސިލްސިލާގެ ހަތަރު ވަނަ ފޯރަމް ކާމިޔާބުކަމާއެކު ރޭ ބާއްވައިފިއެވެ.

ރައީސުލްޖުމްހޫރިއްޔާގެ އޮފީހާއި ޕަބްލިކް ސަރވިސް މީޑިއާ (ޕީ.އެސް.އެމް.) ގުޅިގެން ކުރިއަށްގެންދާ ފޯރަމުގައި ރައްޔިތުންނަށް މަޢުލޫމާތު ދެއްވުމަށާއި، ސުވާލުތަކަށް ޖަވާބު ދެއްވުމަށް ރޭ ބައިވެރިވެވަޑައިގެންނެވި ފަސް ވަޒީރުންނަކީ މިނިސްޓަރ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑް މުޙައްމަދު ސަޢީދާއި މިނިސްޓަރ އޮފް އިސްލާމިކް އެފެއާޒް ޑޮކްޓަރ މުޙައްމަދު ޝަހީމް ޢަލީ ސަޢީދާއި މިނިސްޓަރ އޮފް ޓޫރިޒަމް އެންޑް އެންވަޔަރަންމަންޓް ޠާރިޤު އިބްރާހީމާއި މިނިސްޓަރ އޮފް ސޯޝަލް އެންޑް ފެމިލީ ޑިވެލޮޕްމަންޓް ޑޮކްޓަރ ޢާއިޝަތު ޝިހާމާއި އަދި މިނިސްޓަރ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓް ޑޮކްޓަރ ޢަލީ ޙައިދަރު އަޙްމަދެވެ.

މިފޯރަމްގައި ސަރުކާރުން ކުރިއަށް ގެންދާ މަސައްކަތްތަކާ ބެހޭ މަޢުލޫމާތު ވަޒީރުންގެ ފަރާތުން ރައްޔިތުންނަށް ދެއްވައި، ރައްޔިތުންގެ ސުވާލުތަކަށް ސީދާ ވަޒީރުން ޖަވާބު ދެއްވިއެވެ. ދެ ގަޑިއެއްހާއިރަށް ކުރިއަށް ގެންދެވި ފޯރަމްގައި ކުރެވުނު ސުވާލުތަކުގެ އިތުރުންވެސް އާންމުންގެ ގިނަ ސުވާލުތަކެއް ލިބިފައިވުމާއި، ބައެއް ފަރާތްތަކުގެ ޒާތީ މައުލޫމާތުވެސް އެ ސުވާލުތަކެއްގައި ހިމެނިފައިވާ ސުވާލުތަކެއް ހުރުމާއެކު، ކަމާ ގުޅުންހުރި ވުޒާރާތަކަށް ސުވާލުތައް ހިއްސާކުރެވި، ޖަވާބުދެވެމުންދާނެއެވެ. މިކަމަކީ ސަރުކާރުން ރައްޔިތުންނާ ވީހާވެސް ގާތުން މަސައްކަތް ކުރެއްވުމަށާއި، ވީހާވެސް ހާމަކަން ބޮޑުގޮތެއްގައި ސަރުކާރުގެ މަސައްކަތްތައް ކުރިއަށް ގެންދިއުމަށް ބާރު އެޅުއްވުމުގެ ގޮތުން ކުރައްވާ މަސައްކަތްޕުޅެކެވެ.

ރޭގެ ފޯރަމްގައި މައިގަނޑު ގޮތެއްގައި ސުވާލުތައް އަމާޒު ކުރެވުނީ ދީނީ، އިޤްތިޞާދީ، އިޖުތިމާޢީ އަދި ވިޔަފާރިއާއި މަތީ ތަޢުލީމުގެ ދާއިރާއިންނެވެ. މި ރޮނގުން އާންމުން ކުރެއްވި ބައެއް ސުވާލުތަކަށް ވަޒީރުން ދެއްވި ޖަވާބުތަކަށް ބަލާއިރު، ކުރިއަށް އޮތީ ބަރަކާތްތެރި ރަމަޟާން މަސް ކަމުގައި ވާ ހިނދު، އިސްލާމީ ރިވެތި އުސޫލުތަކުގައި ހިފަހައްޓައި، އިހުސާންތެރިކަމާއި ކުލުނުވެރިކަން އިސްކުރުމަށް ހަނދާންކޮށްދެއްވިއެވެ. އަދި އަސާސީ މުދަލުގެ އަގުތައް ބޮޑު ނުކުރުމަށްވެސް އިލްތިމާސް ކުރެއްވިއެވެ. ހަމަ މިއާއެކު، ކަނޑައެޅިފައިވާ ބައެއް މުދަލުގެ އަގުތައް އުފުލަމުން ދާ ކަމުގައި ވާ ނަމަ، އެކަމަކާ ގުޅިގެން އަޅަންޖެހޭ ފިޔަވަޅުތައް އެޅުމުގައި ސަރުކާރުން ސާބިތު ކަމާއެކު ކުރިއަށް ދާނެކަމުގެ ޔަޤީންކަން ރައްޔިތުންނަށް ވަނީ ދެއްވާފައެވެ.

ދިވެހިރާއްޖޭގެ ނަން ކިލަނބު ކުރުމަށް ދެކެވޭ ވާހަކަތަކަށް ރިޢާޔަތްކުރައްވައި، އާންމުން އަމާޒުކުރެއްވި ސުވާލުތަކަށްވެސް ވަޒީރުން ވަނީ ސާބިތުކަމާއެކު ޖަވާބުދާރީ ވެވަޑައިގެންފައެވެ. އެގޮތުން ދިވެހިރާއްޖެއަކީ ހައްދުފަހަނައަޅާފައިވާ ޤައުމެއް ކަމުގައި ބުނާނެ އެއްވެސް ފުރުޞަތެއް ނޯންނާނެކަމުގެ ޔަޤީންކަން، މިނިސްޓަރ އޮފް އިސްލާމިކް އެފެއާޒް ޑޮކްޓަރ މުޙައްމަދު ޝަހީމް ޢަލީ ސަޢީދު ދެއްވިއެވެ. އަދި ޗައިނާއާއި ރާއްޖެ ދެމެދު އެކުލަވައިލެވުނު މިނިވަން ވިޔަފާރީގެ އެއްބަސްވުމުގެ ސަބަބުން ޤައުމަށާއި ރައްޔިތުންނަށް ލިބެމުންދާނެ ފައިދާ، މިނިސްޓަރ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑް މުޙައްމަދު ސަޢީދު ތަފްސީލީ ގޮތެއްގައި ވިދާޅުވެދެއްވިއެވެ.

މީގެ އިތުރުން، މަތީ ތަޢުލީމުގެ ދާއިރާގެ އެކި ކަންކަމާ ގުޅިގެން އާންމުންގެ މެދުގައި އުފެދިފައިވާ ކަންބޮޑުވުންތަކަށް މިނިސްޓަރ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓް ޑޮކްޓަރ ޢަލީ ޙައިދަރު އަޙްމަދު ޖަވާބުދާރީވެވަޑައިގެންނެވިއެވެ. އަދި އިޖުތިމާޢީ ގޮތުން ރާއްޖެއަށް ކުރިމަތިވެފައި ވާ އެކި މައްސަލަތަކާ ގުޅިގެން އާންމު ރައްޔިތުން ކުރެއްވި ސުވާލުތަކަށް މިނިސްޓަރ އޮފް ސޯޝަލް އެންޑް
ފެމިލީ ޑިވެލޮޕްމަންޓް ޑޮކްޓަރޢާއިޝަތު ޝިހާމް ޖަވާބުދާރީ ވެވަޑައިގެންނެވިއިރު، ފަތުރުވެރިކަމާއި ތިމާވެށީގެ ރޮނގުން އާންމުން ކުރެއްވި ސުވާލުތަކަށް، މިނިސްޓަރ އޮފް ޓޫރިޒަމް އެންޑް އެންވަޔަރަންމަންޓް ޠާރިޤު އިބްރާހީމް ވަނީ ޖަވާބުދާރީވެވަޑައިގެންފައެވެ.

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ ރިޔާސީ ވަޢުދުފުޅުތަކާ އެއްގޮތަށް، ކަންކަން ފުރިހަމަކޮށްދެއްވުމަށްޓަކައި ކުރިމަތިލައްވަންޖެހިވަޑައިގަންނަވާ އެކި ގޮންޖެހުންތައް ހުރަސްކުރައްވާ، ރައްޔިތުންނަށް ކަންކަން ފަހިކޮށްދެއްވުމަށްޓަކައި އަދުގެ ސަރުކާރުން ކުރައްވަމުން ގެންދަވާ ގިނަ މަސައްކަތްތަކެއްގެ އިތުރު ތަފްސީލުވެސް ވަޒީރުން ވަނީ ރައްޔިތުންގެ ސުވާލުތަކަށް ޖަވާބުދެއްވަމުން ހިއްސާކުރައްވާފައެވެ.