ގަލޮޅު ގާކޮށި ފްލެޓް ސަރަހައްދުގެ ޕާކިން ޒޯނުގެ ބައެއް ހިމެނޭ ގޮތަށް ސްޓެލްކޯގެ ބޭނުމަށް ބަންދުކޮށްފައިވާ ސަރަހައްދު އާއްމުކޮށް ހުޅުވާލުމަށް ސްޓެލްކޯއިން ނިންމައިފި އެވެ.
ސްޓެލްކޯގެ އެމްޑީ ހުސެން ފަހުމީ އެކްސްގައި މިއަދު ވިދާޅުވީ "ރައްޔިތުންނަށް ތަކުލީފަކަށް ވެފައިވާ ކަންކަމަށް ހައްލު ހޯދައިދިނުމަށް ކުރަމުންދާ މަސައްކަތްތަކުގެ ތެރެއިން، ގާކޮށީގެ ޕާކިންޒޯނުން ބައެއް ހިމެނޭގޮތަށް ސްޓެލްކޯއިން ބަންދުކޮށްފައިވާ ސަރަޙައްދު މި ހަފްތާ ނިމުމުގެ ކުރިން ހުސްކޮށް އެތަން އާންމުންނަށް ހުޅުވާލުމަށް ނިންމައިފިން" ކަމަށެވެ.
ސްޓެލްކޯގެ ބޭނުމަށް ކުރީ ސަރުކާރުން ބަންދުކޮށް، ހުޅުވަން އިންކާރުކޮށްފައި ހުރި މާލޭގެ ކާރޫބާރޫ ބޮޑު ބައެއް މަގުތަކާއި ގޯޅިތައް، ފަހުމީ މަގާމާ ހަވާލުވެވަޑައިގަތުމަށްފަހު ގެންދަވަނީ ހުޅުއްވަވަމުންނެވެ.
"ސްޓެލްކޯއަކީ ރައްޔިތުންގެ ދިރިއުޅުމުގެ އެންމެ އަސާސީ ޚިދުމަތުގެ ބައިވެރިޔާއަށްވާއިރު، މި ކުންފުންޏަކީ، ރައްޔިތުންނާއި ވީހާވެސް ގާތުން މަސައްކަތްކޮށް، ރައްޔިތުންގެ އިތުބާރު ލިބިފައިވާ ކުންފުންޏަކަށް ހެދުމަށް ކުރަމުންދާ މަސައްކަތްތަކުގެ ތެރެއިން މިފަދަ ގިނަކަންކަމަށް ދަނީ ހައްލުހޯދައިދެމުން،" ފަހުމީ ވިދާޅުވި އެވެ.
ސްޓެލްކޯއިން އަބަދުވެސް މަސައްކަތް ކުރަމުން ގެންދަނީ ރައީސް ޑރ. މުހައްމަދު މުއިއްޒުގެ ސަރުކާރުގެ ހަރުދަނާ ސިޔާސަތުތަކާ އެއްގޮތަށް ރައްޔިތުންނަށް ތަކުލީފަކަށް ވެފައިވާ ކަންކަމަށް ހައްލު ހޯދައިދިނުމަށް ކަމަށް ވެސް ފަހުމީ ވިދާޅުވި އެވެ.
ރައީސުލްޖުމްހޫރިއްޔާ @MMuizzu ގެ ސަރުކާރުގެ ހަރުދަނާ ސިޔާސަތުތަކާއި އެއްގޮތަށް ރައްޔިތުންނަށް ތަކުލީފަކަށް ވެފައިވާ ކަންކަމަށް ހައްލުހޯދައިދިނުމަށް ކުރަމުންދާ މަސައްކަތްތަކުގެ ތެރެއިން ގާކޮށީގެ ޕާކިންޒޯނުން ބައެއް ހިމެނޭގޮތަށް ސްޓެލްކޯއިން ބަންދުކޮށްފައިވާ ސަރަޙައްދު މި ހަފްތާ… pic.twitter.com/CiY7GAvCjS
— Hussain Fahmy (@u09HussainFahmy) February 20, 2024