މަންމައަށް އަދި ހިތްވަރުން އެބަ މަޑުމަޑުން ނޭވައިލެވޭ
އަންނަ އިޙްސާސާ ޚިޔާލުން މަންޒަރެއް ހިތުގައި ފެވޭ

ވާގިނެތް ދުލުގައި އުދާހާ ޖާޒުބީ އެކި އިލްތިމާސް
ވާކަމުން ހައްޔަރުވެފައި ގިލަނާއި ކެކުޅުން އިތުރުވޭ

ކޮންމެ ކުއްޖަކު ބޮޑުކުރާން ތަޢުލީމުދީގެން މޮޅުކުރާން
ދިން ފިދާޔާ ދުށް ނަތީޖާ ފެންނަ ކަރުނުން ދޭހަވޭ

ކާކުހޭ ކާއެތިކޮޅެއް ދޭން އައިސް އުޅޭ ބާބޫއަކީ؟
ކާންލިބޭ ކެއުމެއްގެ ރަހައެއް ރާޙަތެއް އަރަކަށް ނުވޭ

ކާކުހޭ ގައިދޮވެލަދީ ތަންމަތި އަޅާ ސޯޖާއަކީ؟
ސާފު ތަރުތީބެއް އަރާމު ވަހެއް އެނގޭ ކަމަކަށްނުވޭ

ކާކުހޭ އަހަރެންގެ ދިވެހި ލިބާސް ފަހައިދޭ ޕުތުރަކީ؟
ބޯވަޅެއް ބަދަނެއް ބަތާނަގަނޑެއް ކަކެއް ދިމައެއްނުވޭ

ކާކުހޭ ފައިސާ ފިހާރައިން ގެންނަ ޝަންކަރުޖީއަކީ؟
ކާފަމެންނާ މާމަމެންގެ ލަޔާޤަތަށް ސާބަސްދެވޭ

އޭ ދަރީންނޭ ތިޔަ ކުދީން ތިޔައީ މި ގޭގައި ކޮންބައެއް؟
ލޭގެ ތަރިކައިން މިންވަރެއް ވެސް ނުލިބެނީހެ؟ އަޖައިބުވޭ

ލޯ މަރާލައިގެން ދިމާ ފުރަގަސްދެނީ މި އަމާނަތަށް،
ލޯބި މަރުވީހޭ ޟަމީރުތަކުން….! ވަރަށް އެބަ ގިސްލެވޭ

ކީއްވެހޭ ތިޔަހައި ހިތެއް އަގަލެއް ފިތެއް ކުލުނެއް ނެތީ
ނީވެނީ މަންމަގެ މި ރުއިން އިވުނަސް އިވޭކަމަކަށްނުވޭ

އަތް އުރައިލީމާ ކޮކާހެން އުދުހެވޭނީހޭ އުހަށް
ފަތް ގެޔާ ގޯތީގެ ބީވާ ތަން ދެކޭށަ ކެތެއްނުވޭ

މަންމައަށް ދިން ފިރުމުމެއް މަދަދެއް އުފާވެރި ހީނލުމެއް
އެންމެ ކުއްޖަކު ވެސް ހަނދާންވޭހޭ؟ އެނޫން ދިރުމެއްނުވޭ

އޭ ދަރީންނޭ އެނބުރި އަންނާށޭ މި ހިތް އަދިވެސް ހެވޭ
ރޭ ދުވާ ހެކިކޮށް ބުނަން، މި ފުރާނަ ފަދައިން ލޯބިވޭ

ލޮނުފެނުން ފެންދޭ ގަހެއް މަރުވާ ފަދައިން ހިކިފަސްމަތީ
ތުނި މިހިތް ފުނޑުފުނޑުވެ މިދަނީ…! ލޯ މިހާރަކު ނުހުޅުވޭ