އޭނާގެ ޅެންތައް ހުންނަނީ ހިތުދަސްވެފައި އަހަރެން ކިޔާ
ވޭނާ ތުރާތައް ނޫފުލައި ފެނިލާ އިރަށް ގުޅެނީ ލެޔާ
އޭނާގެ ލޯ ފުރަތަމަ ކިޔައިލަން ލިބުނު ޅެމަކީ ސާޙިރީ
އޭގައިވި އެސްފިޔަތައް ހިތަށް ގެނައީ ރުބާޢީ ކާފިޔާ
އޭނާގެ މޫނު އެއަށް ފަހުން ޝާއިޢުވި ޅެމަކީ ޖާދުވީ
އޭގައި އޮމާންކަން ހުންނަނީ ބުރުދާ ފަދައިން ފިނި ރޯޅިޔާ
އޭނާގެ ދެ ބުމަ ދެ ތުންފަތާއި ދެލޯ ދެ ކަންހުޅި މިންވެލީ
ދޭހެން ދިޔޯ އަރުމާޒުގައި އަޑުތައް ގަތައި ފިލިކޯޅިޔާ
އޭނާގެ ހިނިތުންވުން ދެނީ އަލިމުތްތަކެއް މާ ރޯޝަނީ
އޭގައިވި ބަނޑުވައްއެކުލެވުން އެއް ފަދަ ޖަމީލުގެ ދުނިޔެޔާ
އޭނާގެ އިސްތަށިގަނޑު މި ވެސް ޗާލޫ ޅެމެއް މޮޅު ޖާޒުބީ
އޭގައި އެ ވާ ލުއި ބާނިތައް ދޭ ނީލުގައި ހިނގަމުން އޮޔާ
އޭނާގެ ބަސް މީ ވެސް ވަރަށް އަގުހުރި ޅެމެއް މާތް މާނަވީ
އޭގައިވި ފުންކަން ލައްްޒަތާ ދަންނާނެ ކަނޑުތައް މާމުޔާ
އޭނާގެވަސް މީވެސް ޅެމެއް މުޅި ދުނިޔެ ވަގުތުން މަސްތުވީ
އޭގައިވި ތާސީރަށް އެދޭ ކެލަޔާ ބޮކަރު ކަސްތޫރިޔާ
އޭނާގެ ޙަރަކާތްތައް މިއީ ޅެމަކީ އިނގޭތޯ ޝާޢިރީ
އޭގައިވި ބާރެއް ޤައިސު ވެސް އުނގެނެންޖެހޭނީ ދޭހަޔާ
އޭނާގެ ޅެން ފޮތް އޭ ޔަޤީން ރީތީގެ ހެއްކެއް ޤުދުރަތީ
އޭ މާތް އަޚާއޭ ލިބުނު ނަމަ އެއް ފަދަކުރާތި! ފުރާނަޔާ
