ގިނި އަންދަމުން މިނިވަންދުވަސް އައިއިރު ބިރުން ތުރުތުރު އަޅާ
ދިނިގެން މިތާ އުޅެވުނު ދުވަސް ދިޔަކަން އެނގޭތީ ފަހަނަޅާ
އަޔަކަސް ތަނަށް މި ދުވަސް މިއަދު،ބަޔަކަށްލިބޭ އުފަލެއްނެތޭ
ވަޔަކުންޖެހޭ ނެތް ފިނިކަމެއް ވޭނުން ހިތުގެ ފުނުގައި އަޅާ
އަޅުވެތިކަމުގެ ދިލަ ހޫނަކުން ވިރި އޮހޮރެނީ މި ހިތާ ލެޔާ
ފަޅުކަމުގެ ސާލެއް އޮތްކަމުން މުޅި ގައި ވަށާލައިފައި އޮޅާ
ރަހުމެއްނުވާ ބަޔަކުގެ އަތުން ހުއްޓައިނުލައި ދޭ ޙަމަލައިން
ޝަޚުޞިއްޔަތެއް ނެތިގެންދަނީ މޭގަނޑު އެކީގައި ފޫ އަޅާ
ހެޔޮވާނެތޯ ކުށަކާނުލައި މިގޮތަށް މިފަދަ އަނިޔާކުރާން
ހެެޔޮވާނެތޯ އަލިފާންޖަހައި އަންދަން އެއަށް ތިބެ ދަރުއަޅާ
****
ކޮންކަހަލަ ގުރުބާނެއްހެވީ މިނިވަންކަމެއް ހޯދަންވެގެން
ފެންނަން ލިޔެވިފައި މިއަދުވެސް ހުންނާނެޔޭ އެ ހުދުންކަޅާ
އެ ހަނދާން ނެތީ އަދު ކީއްވެހޭ؟ އެ ޢަޒުމް ނެތީ ފަހެ ކީއްވެހޭ؟
އެ ހަނދާން މި ދީބުގެ ފަސްގަނޑުން ފޮރުވާލަނީހޭ ފަސްއަޅާ
ފެއްސާ ރަތާއި ހުދުން އެހެރަ ވިހުރޭ ނިޝާނުގެ އަޑުއަހާ!
ހުއްޓާނުލައި ލޭ ކަރުނުތައް ދެ ލޮލުން މިއަދު އެބަހަރައަޅާ
