މިހާރު މި ވަގުތު ވެސް ހުރަގޭގައޭ މި އޮތީ މަ ކަނުބަނދެފައި
ކިހައި ހިތް ދަތި ކިހައި މަޖުބޫރު ހޭ ވި ޙަޔާތް މަށަށް ލިބިފައި
ކޮބައިހޭ އިރުހަނދުން ހަދިޔާކުރާ މިނިވަންކަމުގެ އަލި ނޫރު
ނުބައި ކަޅު އަނދިރިކަން ނޫނީ ނެތޭ އަހަރެން ވަށައިލެވިފައި
އިވޭހޭ ބަލަ މަގޭ ތަހުޒީބު ނިޔަނެތި ސާހިބާ މި އުދާސް
ނުވޭހޭ މާނައެއް މި އަސަރުތަކުން ތިޔަ ޒިހުނުގައި ފެވިފައި
މި ހުރަގޭން ނެރެވެނީ ނަމަ ފަސް ފުލުހުމީހުން ބަލައި އާދޭ
އެހެރަ ވަރުގަދަ ޙިޞާރު ތެރޭ ވަނީ ދެން ވެސް މަ ޤައިދުވެފައި
އެއާއެކު ކަނު މޮހައިލައި ޖައްސަނީ އެ ވަގުތު ގުލާނުކުރާން
މެޔަށް ލިބެނީ ހެ މާ ބޮޑު ފިނިކަމެއް ރޫޙަށް ދިރުން ލިބިފައި
އެ ވޭންތަކުގައި އޮހޭ ލޭ ކަރުނަޔަށް ހިކުމެއް އަޔަސް އަމުދުން
އެވީ ތަޅުވައި މަ ފޮޅުވާށޭ ކޮބައި ޙައްޤެއް މަށަށް ދެވިފައި
ކިހައި ބަނޑުހައިވެ ޙާލެއް ނެތި ދިޔައިމާ ހެއްޔެ ނުރުހުމުގައި
ޖަހައި މަދު ކޯވަރެއް ތިޔަ ދެން ދެނީ މާ ވިސްނަވިސްނައިފައި
މަ ލައްވައި ގަދަކަމުން ކުރުވާ އެތައް ގިނަ ބުރަ މަސައްކަތުގައި
އަލަށް އެތަކެއް ބަޔެއްގެ ހިތޭ ވަނީ ވަގުތުން ޒަޚުމްވެވިފައި
އަދީބާ ނާޤިދާ ޝާޢިރު މުއައްލިފު ވެސް ކުރާ ދަޢުވާ
ތަދީއޭ މިއަދު މިނިވަންކަން، ކޮބައި ޝަޚުޞީ ގޮތުން ދެވިފައި
ދުނިޔެ ބުނެދީ ބަލާށެ ނިކަން އިމެއްނެތި އޮންނަ މިނިވަންކަން
ދުނިޔެ ދީފާނުހޭ އެ މަށަށް، އެ ކަން އޮތް ނަމަ ވުޖޫދުވެފައި
އެކުން ޙައްދެއް ނުވާ މިނިވަންކަމަށް ދަޢުވާ ވެވޭ އިރުގައި
އެކަން ބުނެދޭ މި މެދުވެރިޔާ ވަނީ ކަސްތޮޅު އަބަދު އެޅިފައި
މިއީ ގަލަމެއް އެ ގަލަމުގެވެރި އަދީބާ ދެއްކި ވާހަކައޭ
މިހެން ޤައިދެއް ނެތަމަ ގަލަމަށް، އެއިން ލިޔެވޭ ހެ ހީނހީނފައި
