ޢީދު އަޔަކަސް މާ އުފާވެރި މަންޒަރެއް އަދު ނުފެނެޔޭ
ޢީދު އައުމުން ޢީދު ކޮށްލަން މިސްކިތައްވެސް ނުދެވެޔޭ
ހީ ސަމާސާކޮށް އަތާއަތް ޖޯޑުކޮށް މަތިވެރި ސަލާމް
ދީނުގައި އެންގެވިމަގުން ކުރުމަށް ޢުޒުރުވެރި ވެއްޖެޔޭ
ގާތް ތިމާގެ ކަމާއި ރަޙުމަތްތެރި ކަމާ ރައްޓެހިކަމާ
ގާތް ގުޅުން އޮތް،ބަދަހިކޮށްލަން ގޭގެއަށްވެސް ނުދެވެޔޭ
ޢީދު ކުޅެލަން އެއްވެ އުޅުމީވެސް އެއީ ބޮޑު ގޯހެކޭ
ޢީދުވެދުމާ ގޮސްލެވޭނޭ ފުރުޞަތެއްވެސް ނެތްމެޔޭ
ތިން މުގޯއްޔާ މަންޑިޔާ ފަން ކުޅުނު މަޒީ ސިފަވުމުން
އިންތަނުން ތެދުވާނެ ހިތްވަރުވެސް ގަޔަކު ހަމަ ނުހުރެޔޭ
ތާރަ ޖެހުމާ ލަނގިރިޔާ ހަރުބީގެ ފަރި މަންޒަރުތަކާ
މާލި ނެށުމާ ދަފި ނެގުން ޢީދުން ހަނދާނާ ކުޅެލަޔޭ
ހަނދުމަތައް އާވާން ފެށީމާ މިހިރަވާ އިޙްސާސްތަކުން
އަދުގެ ޙާލަތު އޮތްގޮތުން ލޮލަކުން ކަރުނައެއް ނުހިކެޔޭ
ދުނިޔެއަށް ކުރިމަތިވި ބިރުވެރި ކޮވިޑް އުނަވިހިކީ ވަބާ
އުނިކަމެއް މުޅި ދުނިޔެއަށް އެކި ގޮތްގޮތުން ގެނުވައިފިޔޭ
މިފަދަ ހިތްދަތި ވަގުތުގައި މިކަމުން ނަޖާކޮށް ދެއްވުމަށް
ދެފަދައެއް ނެތް މާތް އިލާހަށް ހެޔޮ ދުޢާތައް ކުރެވެޔޭ
އައި މި މަތިވެރި ފިޠުރު ޢީދުގެ ތަހުނިޔާ އާ ހެޔޮ އެދުން
ހައި ނުކޮށް ފޮނުވަން ޙަވާލުކުރަން އޮތީ ވައި ރޯޅިޔޭ
