ކުރިއަށް އޮތް ލޯކަލް ކައުންސިލް އިންތިހާބުގައި ވޯޓު ދޭންވީ ތިލަފަތަކަށް، ރުކަކަށް، ދޮލަނގަކަށް ނޫން ކަމަށާއި ވޯޓު ދޭންވީ އެންމެ ޤާބިލް، އެންމެ ހިންގުންތެރި މީހާއަށް ކަމުގައި ދިވެހި ނެޝަނަލް އެކްޝަން (ޑީ.އެން.އޭ) ގެ އުމަރު ނަސީރު ވިދާޅުވެއްޖެއެވެ.

ޑީ.އެން.އޭގެ ވީޑިއޯ ބަޔާނެއްގައި އުމަރު މިއަދު ވިދާޅުވީ ދިވެހިރާއްޖެއަށް ލޯކަލް ކައުންސިލުގެ ނިޒާމު އައިއްސުރެ މިއަދާ ހަމަޔައް ދިވެހީންގެ ތެރެއިން ގިނަ މީހުން ވޯޓް ދެނީ ޕާޓީ ބުނާގޮތަށް ކަމަށާއި ޕާޓީ ދައްކަނީ ކާކުތޯއެއް ނުބަލާ ކަމަށެވެ.

"މިހެންވުމުގެ ސަބަބުން ނަތީޖާއަކަށްވީ ބައެއް ރަށްރަށުގެ ކައުންސިލްތަކަށް ވަރަށް ނާގާބިލް މީހުން އައުން. ހިންގުންތެރިކަމުގެ އެއްވެސް ތަޖުރިބާއެއް ނެތް މީހުން އައުން. އޭގެ ނަތީޖާއަކަށްވީ ރަށުގެ ކުރިއެރުންތައް ހުއްޓި އެތައް ތަނެއް ފަހަތަށް ދިއުން. މިފަހަރު ޑީ.އެން.އޭއިން އަޅުގަނޑުމެން މި ގޮވާލަނީ މިފަހަރު ވޯޓް ދެއްވަން ވާނީ ތިލަފަތަކަށް، ރުކަކަށް، ދޮލަނގަކަށް ނޫން. މިފަހަރު ވޯޓް ދެއްވަންވާނީ ޤައުމަށް. އެންމެ ޤާބިލް މީހާއަށް. އެންމެ ހިންގުންތެރި މީހާއަށް. އެންމެ ފަސްބައި ސާފު މީހާއަށް. އެންމެ ރަނގަޅަށް ކިޔަވައިގެން ހުރި މީހާއަށް. އެއީ ރަށުގެ ހިންގުންތެރިކަމުގެ މަށްޗަށް ބިނާވެގެން ނޫނީ ރަށުގެ ކުރިއެރުމެއް ނޯންނާނެ."

އުމަރު ވިދާޅުވީ ޕާޓީ ބުނާގޮތަށް ރަށް ދަތުރުކޮށްގެން ލިބުނު އެއްވެސް ފައިދާއެއް "މިވީހާ ތަނަށް އަޅުގަނޑަކަށް ފެންނާކަށް ނެތް" ކަމަށެވެ.

"ރަށް ބައިބައިވެ، ރަށުގެ ދެބައިމީހުން ދެކޮޅަށް ދެ ދިދަ ނަގައިގެން ދުވާލު ބާރަށް ލަވަޖަހާފަ ރޭގަނޑު ކަޅުތެޔޮޖެހުން ނޫން ކަމެއް މިހާ ހިސާބަކަށް ވެފައެއް ނެތް."

އުމަރު ވިދާޅުވީ ލޯކަލް ކައުންސިލްގެ ނިޒާމަކީ އަދި ވަރަށް ބޮޑަށް އިސްލާހު ކުރަންޖެހޭ ނިޒާމެއް ކަމަށެވެ.

"ސަރުކާރުން އެބަބުނޭ ކައުންސިލް ތަކަށް ބާރުދިނީއޭ. އެއްވެސް ބާރެއް ނުދޭ ހަގީގަތުގައި އިނގޭތޯ. މީގެ ކުރީ ސަރުކާރުތަކުންވެސް ހަމަ ދީފަ ހުރި ބާރު ހަމަ ދިނީ. ކޮން ރަށަކަށްތޯ ދިނީ ގޯތި ދޫކުރުމުގެ ބާރު؟ ނުލިބޭ އެއްވެސް ބަޔަކަށް. އަދިވެސް އޮތީ ހަމަ ހައުސިން މިނިސްޓްރީގައި. ގާތްގަނޑަކަށް ހަމަ ހުރިހާ ބާރެއްވެސް ހުރީ ހައުސިން މިނިސްޓްރީއަށް ޖަމާކޮށްފައި. އިންތިހާބު ކައިރިވީމަ އެމް.ޑީ.ޕީން ވަރަށް ގިނަ ވާހަކަ ދައްކާ ބާރުތައް ދޫކުރީއޭ. ދުލެއް ނުކުރޭ ހަގީގަތުގައި ބާރުތަކެއް."