ދިވެހިބަސް ފަދަ އަސަރުގަދަ ބަސް މަދޭ އެދުރުން އެބުނަނިއްޔޭ
އެހެންވީއިރު މިބަސް ބަހަކަށް މި ނުވަނީ ކީއްވެގެންހެއްޔޭ
ދިވެހިބަހަކީ ޙަޤީޤަތުގައި ވަރަށްވެސް ރީތި ފޮނި ބަހެކޭ
ދިވެހިފޮތްތައް ބޮޑެތި ޢިލްމީ ކިހައިވަރަކަށް ހުރޭހެއްޔޭ
ދިވެހިބިމުގައި ދިވެހިބަސް އެކަނި އޮވެގެން އުޅެވުނެއްނޫންހޭ
ދިވެހި އުސްތާޛުނާ ބަޠަލުންގެ ބަހަކީވެސް މިނޫންހެއްޔޭ
އެހެން ބަހަކުން ބަހެއް ނުލިޔަސް ބުނަން ބޭނުންބަހެއް ބުނެވޭ
ބަހެއް އެއްފަދަ މިފަދަ މުއްސަނދި މިސަރަހައްދުން ފެނޭހެއްޔޭ
މިއީ ޤައުމީ އަމިއްލަ ބަހޭ، ދިވެހި ޤައުމިއްޔަތުގެ ރުކުނޭ
މިއީ ލިބިފައިވާ ދިވެހީންނަށް ކިހައިބޮޑު ނިޢުމަތެއް ހެއްޔޭ
ޤަރުނުތައް ވޭތުވީ މާޒީ، ވެރީންނަށް ޙުރުމަތާ އެކުގައި
ދަރަޖަތައް ހުރިބަހެއް މިކަހަލަ މަދުންނޫނީ ފެނޭ ހެއްޔޭ
އެތައް ގިނަ ގުނަ ބަހުރުވަޔަކާ ރަށަށް ވަކި ޚާއްޞަ ބަސްހުރެޔޭ
ހިތަށް ހަމަ ސިފަވެވޭ ގޮތްތައް ދުލުން ދެން ސިފަ ކުރަންވިއްޔޭ
މިހިރަ ގޮތްތައް އުކާލައިފައި، ކިޔެވުމަށް މޮޅުވުމާއެކުގައި
އިހުގެ އެދުރުން ގެނައި ހަމަތައް ނަގާފައި ފައިދަށަށް ލިއްޔޭ
ޒަމާނީ ވާނަމޭހީކޮށް، ފަށާ ތަޢުލީމު ދޭހަ ބަހަކަށް
ތިމާމެން ބޭރުބަސް ހެދުމުން މިކަން ވާނޭ ގޮތަށް ވިއްޔޭ
ގެޔަށް ވަދެނުކުމެވާ މީހުން، ސަޔަށް ގޮސް އެކު އުޅޭ މީހުން
އެއަށްފަހު ކުޑަ ދުވަސްކޮޅަކުން ދެބަސް މަސްހުނި ކުރަންވިއްޔޭ
ދިވެހިބަސް ދިވެހި ދެއަތުންކަން، މިއަލިފާނަށް ލަމުންމިދަނީ
ދިވެހިބިމުގައި މިކަން ވިސްނޭ ބަޔަކުވެސް އަދު އުޅެންވިއްޔޭ
ދިވެހިބަސް ދެކެ ނުހަނު ލޯބިން، ރޮމުންތިބި ބަޔަކު އެބަ ބުނެޔޭ
ދިވެހިބަސް އަދުއޮތީ ނޭވައި ނުލެވިގެން ހޮޅި ގުޅައިފައްޔޭ
ފަށާ ތަޢުލީމު ދިވެހީންދީ ދިރާސާ ބައިބަޔަށް ނެރެދީ
ވަށައިގެން ޢިލްމު ބޭހުންދީ، ބަހަށް ފަރުވާ ފަށަންވިއްޔޭ
ނެތިއްޔާ ދިވެހި ބަސް ޤައުމިއްޔަތުން ރުކުނެއްއެ އުވުނިއްޔޭ
ނަތީޖާ ހިތި، ދުލެއްނެތް ޤައުމަކަށްވެ މިތަންއެ ނިމުނިއްޔޭ