ސަލާމަތުގައި ހިމޭން ގައުމެއް ސަމާލުވެފައި އޮތީ ބިމުގައި
ޒަމާނުގެ ފޭރާމުން ޖަރީވެވިގެން އޮމާން އިމުގައި
މިރީތި ފަޒާގެ ކުލައަލި އުދަރެހާ ވިނަފެހި ބިމާއި ކަނޑާ
ތިރީސްދެއަހަރު އެއީ ކުރިއޭ ކިލަނބު ކޮށްލީ އަދާވަތުގައި
ރިޔާސީ ނިމި ދެ ދައުރެއް ފެއްޓުމަށް އާދައުރަކަށް ދިވެހީން
ކިޔާށޭ މަރުހަބާ ތައްޔާރުތައް ކުރަމުން ދަނީ ތަނުގައި
ނަވާރައަށާހި ވަނަ އަހަރުގެ ނޮވެންބަރު ދެވަނަ ދުވަހުގެ އިރު
އަރައިގެން ދައުރުކޮށް ގޮސް އޮއްސުނީ ފުރިހަމަ އަމާންކަމުގަ
އަރާމުގެ ތަންމަތީ ތިއްބާ ނޮވެންބަރު މަހުގެ ތިންވަނަރޭ
އަރައިގެން ލަޝްކަރެއް ބޭރުގެ އަކީ ހަޑި ހުތުރު އެދުމެއްގައި
ދިވެހި މަދު ޚާއިނުން ކޮޅަކާ ޕްލޮޓް ނަމަކަށް ކިޔާ ބަޔަކާ
ދިވެހި ވެރިކަން ހިފަން އެ އައީ އެތައް ހަތިޔާރަކާ އެކުގައި
ދިފާއީ މަރުކަޒަށް ހަމަލާގެ ފުރަތަމަ ދިން އަޑާއެކުގައި
ދިފާއީ އުންޑައެއް ރައްދުން އައީ ހަމަ ފަޅި ސިކުންތެއްގައި
ލިބުނު ހައިރާންކަމާ އެކުގައި ދެލޯ ބާޣީން ގެ ބޮޑުވިތަނާ
މިބުނި ޕާޓީގެ ލީޑަރު މަރުވިއޭ އުންޑައިގެ ބީހުމުގައި
ވަސަންތީ އޭ ކިޔާ ނަމަކަށް ގުރޫޕުގެ އެންމެ އިސްވެރިޔާ
ހުސެން އާދަމްގެ އުންޑައިން ވެއްޓުނީ މިބިމަށް ހިމޭންކަމުގައި
ފަތިހު ހަތަރެއް ޖެހިއްސުރެ ހުއްޓުމެއް ނެތި ފެއްޓި ހަމަލާގައި
ހަތަރުދަމުވެސް ދިވެހި ސިފައިން ތިބީ ސާބިތުކަމާ އެކުގައި
ރެކީ ޕެޓްރޯލަކަށް ދިވެހީންގެ ލަޝްކަރު ހިއްވަރާ ކެރުމާ
އެކީ ނުކުތުން ދުށީ ބާޣީން ނިކަން ސިހުމާއި ޖެހިލުމުގައި
ހިގައްޖޭ ރޫޅިގެން ހުރިހާ ނިޒާމެއް ބޭރު ބާޣީންނަށް
އެނގިއްޖޭ ކާމިޔާބެއް ދެން ނުވާނޭކަން މި ހަމަލާގައި
ޣަދަރުވެރި ރޭވުމެއްގައި ދެން އަވަސްވެގަތީ ފިލައިގެން ދާން
ބަނދަރުގައި އޮތް ދިވެހި ބޯޓެއް ކުރީ ހައިޖެކް މިބޭނުމުގައި
ބަލާނުމެލާ ފުރާނައަކަށް އެ ދިން ހަމަލައިން ދިވެހި ސިފައިން
ސަލާމަތް ކޮށްދިނީ މިބިމާ ދިވެހި ގައުމާ ހަގީގަތުގައި
މިހުރިހާ ކަންކަމެއް ނިމިގޮސް ފުރައިގެން ދިޔަ ފަހުން ބާޣީން
އެހީވާން އިންޑިއާ ސިފައިން މަތިންނާ އައި ދެ މަނަވަރުގައި
ކުރިން ތައްޔާރުގައި ތިބި ބައަކު ހެން ހީވާނެ ބީދައަކުން
މުޅިން ފުރިހަމަ ނިޒާމެއް ގައި އައީ މިއުރެން ފްލީޓެއްގައި
އަވައްޓެރި އިންޑިއާގައި އޮތް ރަޖީވްގެ އޭރު ސަރުކާރުން
އަވަސް ހަރަކާތަކުން ލިބުނީ އެހީ އިރުއޮއްސުމަށް ފަހުގައި
ރަހީނުންނާ ފިލައިގެން ދިޔަ ޕްލޮޓު މީހުން ގެނެސްދިނުމާ
އެހީ ދިން އިންޑިއާ ސިފައިން ހިނގާ ދިޔަ ބޮޑު ޝަރީއަތުގައި
ޝަހީދުވިއޭ ނަވާރަ ދިވެހި އަޚުން މިނުބައިވި އުދުވާނުން
އެއީތަ! އެގާރަ އާންމުންނާ ސިފައިންގެ އަށެއް ގެ އަދަދެއްގައި
ގެތައް ވެސް ލޫޓުވާ ނެތިކޮށް ކަރާމާތާއި އިންސާނީ
އެތައް ގިނަގުނަ އިމާރާތަށް ދިނޭ ގެއްލުން މި އަނިޔާގައި
ނުދިން އެއްވެސް އަޚެއް އުޚުތެއް ބަހުން އަދި ޢަމަލަކުން ނަމަވެސް
އެދިން ހަމަލާ އަކަށް ބައިވެރި ވުމެއް އެދުވަހު މިރާއްޖޭގައި
މިކަންތައްތައް ހިނގާ ދިޔަގޮތް މިކަން ކުރި މީހުނާ ސަބަބާ
ނިކަން ކަޅުދެއްޔަކުން ލިޔެފައި ވެޔޭ ދިވެހީންގެ ހިތްތަކުގައި
ދިވެހި ގައުމަށް ލިބުނު ނަސްރުން ދިވެހި ތާރީޚު ގައި އެދުވަސް
ދިވެހި ބިމުގައި ވަނީ ފާހަގަ އެއް ނަސްރުގެ ދުވަސް ކަމުގައި