ކޮވިޑް ވެކްސިންގެ ދެ ވަނަ ޑޯޒަށް ދެ ހަފުތާ ހަމަވުމުން، ކަރަންޓީނުނުވެ ރަށްރަށަށް ދެވޭނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.

އިނގިރޭސި ބަހުން ކުރެއްވި ޓްވީޓެއްގައި ރައީސް މިރޭ ވިދާޅުވީ ކޮވިޑަށްފަހު އާންމު ހާލަތަކަށް ދިރިއުޅުން ބަދަލުވުމަށް އިންތިޒާރުކުރަމުން އަންނައިރު، ކޮވިޑް ވެކްސިންގެ ދެ ވަނަ ޑޯޒް ޖަހާތާ ދެ ހަފުތާ ހަމަވުމުން، ރަށްރަށަށް ދަތުރުކުރުމަށް އެއްވެސް ހިފެހެއްޓުމެއް ނޯންނާނެ ކަމަށެވެ. މި މެސެޖާއެކު ރައީސް ސޯލިހު ވަނީ، ރާޅާ އަޅާ ޒުވާނެއްގެ ފޮޓޯއެއްވެސް ޓްވީޓުކުރައްވައިފައެވެ.

A year ago today, Malé city went into lockdown following its first positive Covid19 case.

As we wait for life to return to normal, I’m happy to announce that those who’ve had 2 weeks pass since their 2nd vaccine dose can soon travel freely to the atolls.

????@LiquefyMaldives pic.twitter.com/NADQxga27U

— Ibrahim Mohamed Solih (@ibusolih) April 15, 2021

މިހާރު ހަދައިފައި އޮންނަ އާންމު ގަވައިދު ބުނާ ގޮތުން ކޮވިޑް ފެތުރިފައިވާ ރަށަކުން އެހެން ރަށަކަށް ދެވޭނީ ކަރަންޓީނުގައި 10 ދުވަހު ހުންނަ ގޮތަށެވެ. ނަމަވެސް ސަރުކާރުގެ ވަފުދުތަކަށް އެ ގަވައިދެއް ނޯވެއެވެ.

ކޮވިޑްގެ ދެ ވަނަ ޑޯޒް ޖެއްސެވިތާ ހަފުތާއެއް ނުވަނީސް ރައީސް ސޯލިހުގެ އަނބިކަނބަލުން ފަޒުނާ އަހުމަދު މިއަދު ވަނީ ކޮވިޑަށް ޕޮޒިޓިވްވެފައެވެ.

"ރައީސުލްޖުމްހޫރިއްޔާގެ އަނބިކަނބަލުން މިހާރު ހުންނެވީ ޢާއިލާއާ އެކަހެރިވެވަޑައިގެންނެވެ. އަދި، އެކަމަނާ ކޮވިޑަށް ޕޮޒިޓިވްވި ކަމުގައިވިޔަސް ޙާލުކޮޅު ރަނގަޅެވެ. ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި އެ ދެކަނބަލުންގެ ދެ ބޭފުޅުން ކޮވިޑް-19 އަށް ހެއްދެވި ޓެސްޓުގެ ނަތީޖާ ވަނީ ނެގެޓިވްވެފައެވެ." ރައީސް އޮފީހުން މިއަދު ނެރުނު ބަޔާނެއްގައި ބުނެފައިވެއެވެ.