އެމް.އެން.ޑީ.އެފްގެ މޭޖަރ ރޭންކުގައި ތިއްބެވި އަންހެން ތިން އޮފިސަރަކު، ލެފްޓިނަންޓް ކާނަލްގެ ރޭންކަށް މަޤާމުގެ ކުރިއެރުން މިއަދު ދެއްވައިފިއެވެ. މިއީ އެމް.އެން.ޑީ.އެފްގެ ލެފްޓިނަންޓް ކާނަލް ރޭންކާ ހަމައަށް ދަތުރުކުރެއްވި ފުރަތަމަ ތިން ކަނބަލުންނެވެ.

ލެފްޓިނަންޓް ކާނަލްގެ ރޭންކަށް މިއަދު ހަމަޖެއްސެވި ތިން ކަނބަލުންނަކީ މޭޖަރ ރޭންކުގައި ތިއްބެވި ހައްވާ ޝެނީން އާއި ޑރ. އާމިނަތު ޝުމްރާ އާއި ޑރ. ފާތުމަތު ތަހުސީނާ އިބްރާޙިމެވެ. މީގެ ތެރެއިން ލެފްޓިނަންޓް ކާނަލް ހައްވާ ޝެނިން އެމް.އެން.ޑީ.އެފްގައި ހިދުމަތްކުރައްވާތާ މިއީ 26 ވަނަ އަހަރެވެ.

Sifainge thaareekh gai furathama faharah Lieutenant Colonel ge magaamah, 3 anhen officerakah magaamuge kurierun dhevvaifi. Miadhu magaamuge kurierun libilevvee Major rank gai thibbevi 3 anhen officerun kamugaivaa Hawwa Sheneen, Dr. Fathimath Thahuseena adhi Dr. Aminath Shumra ah. pic.twitter.com/4dterXPQs3

— Maldives National Defence Force (@MNDF_Official) January 25, 2021

ސިފައިންނަށް މަޤާމުގެ ކުރިއެރުން ދިނުމަށް މިއަދު ބަންޑާރަކޮށީގައި ބޭއްވި ރަސްމިއްޔާތުގައި މި ތިން އޮފިސަރުންނަށް މަޤާމުގެ ކުރިއެރުން ދެއްވިކަމުގެ ލިޔުން ހަވާލުކޮށްދެއްވީ ޑިފެންސް މިނިސްޓަރ މާރިއާ އަޙްމަދު ދީދީއެވެ.

މިއަދު މަޤާމުގެ ކުރިއެރުން ލިބިވަޑައިގެންނެވި ސިފައިންގެ އަންހެން އޮފިސަރުންނާ ގުޅޭގޮތުން ވާހަކަފުޅު ދައްކަވަމުން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވީ މިއީ ސިފައިންގެ ތާރީޚުގައި އަންހެން އޮފިސަރުންނަށް މޭޖަރގެ ރޭންކުން ލެފްޓިނެންޓް ކާނަލްގެ ރޭންކަށް ޕްރޮމޯޝަން ލިބިވަޑައިގެންނެވި ފުރަތަމަ ފަހަރުކަން ފާހަގަކުރައްވައިފައެވެ. އަދި މި ކަމުން ދޭހަކޮށްދެނީ، ދިވެހި ޢަސްކަރިއްޔާގައި ވެސް އަންހެން ބޭފުޅުންނަށް އޮތް ހަމަ ފުރުޞަތުތައް ކަމުގައި އެ މަނިކުފާނު ވިދާޅުވިއެވެ.