ކޮވިޑް19 އަށް ފަރުވާ ހޯއްދަވަމުން ގެންދަވަނިކޮށް، ރައްޔިތުންގެ މަޖިލީހުގެ ރ. އަތޮޅުގެ ކުރީގެ މެމްބަރު އިސްމާއިލް ޒަކަރިއްޔާ އަވަހާރަވެއްޖެއެވެ.

ރ. ކަނދޮޅުދުއަށް އުފަން އިސްމާއިލް ޒަކަރިއްޔާ، 79، އަވަހާރަވީ ދަރުމަވަންތަ ހޮސްޕިޓަލްގެ އައި.ސީ.ޔޫގެ ވެންޓިލޭޓަރުގައި ކޮވިޑަށް ފަރުވާ ހޯއްދަވަމުން ގެންދަވަނިކޮށް މިއަދު މެންދުރުފަހުގެ ވަގުތެއްގައެވެ. މިއާއެކު ކޮވިޑް19ގައި ރާއްޖޭގައި މަރުވި މީހުންގެ އަދަދު މިހާރު މިވަނީ 33 އަށް ވަނީ އަރާފައެވެ.

إِنَّا لِلّهِ وَإِنَّـا إِلَيْهِ رَاجِعونَ
R.Atoll ge kureege Majilis member Kan kuri, Alhugaduge loabivaa Bappa, R. kadholhudhoo Ismail Zakariyya, Covid-19 ah positive ve Dharumavantha Hospital gai faruvaadhemun dhanikoh dhaadhi dhemme aku niyaavejje. pic.twitter.com/P2N2VuAdHz

— Ibrahim Azim (@IbrahimAzim9) September 14, 2020

އިސްމާއިލް ޒަކަރިއްޔާ އަކީ ރާއްޖޭގައި އުފެދުނު މަޝްހޫރު ފުޓުބޯޅަ ކެޕްޓަން ޝާހު އިސްމާއިލާއި ކުރީގެ މަޝްހޫރު ދުވުންތެރިޔާ، ބައިސްކަލް ދުއްވުންތެރިޔާ އަދި ފުޓުބޯޅަ ކުޅުންތެރިޔާ މާދިހު އިސްމާއިލްގެ އިތުރުން އެމްއެންޑީއެފްގެ މީޑިއާ އޮފިޝަލް މޭޖަރ އިބްރާހިމް އާޒިމްގެ ބައްޕައެވެ. މި ތިންބެއިންގެ އިތުރުން ވެސް އިސްމާއިލް ޒަކަރިއްޔާގެ 12 ބޭފުޅުން އެބަތިއްބެވިއެވެ. އިސްމާއިލް ޒަކަރިއްޔާ ތިން ބޭފުޅަކާ ކައިވެނިކުރެއްވިއެވެ.

އެންމެނާ ގުޅޭ، ހިތްހެޔޮ މިޒާޖެއްގެ ވެރި އިސްމާއިލް ޒަކަރިއްޔާއަކީ ސަރުކާރުގައި ދިގު މުއްދަތެއްގައި ހިދުމަތްކުރައްވާފައިވާ ބޭފުޅެކެވެ. އަދި ރައްޔިތުންގެ މަޖިލީސްގައި ރ. އަތޮޅުގެ މެމްބަރުކަން 1 ފެބްރުއަރީ 1981 އިން 1 ފެބްރުއަރީ 1985 އަށް ކުރައްވާފައިވެއެވެ.