ރޭދުވާ ދައުރުވަމުންދަނީ ދުނިޔެ އޭގެ އެގްޒިސްގައި އެނބުރެމުން ބުރުއަޅަމުން ދާތީއެވެ. އެހެނަސް މި އެނބުރުން އެއް ސްޕީޑެއްގައި ހިފެހެއްޓިފައެއް ނުހުރެއެވެ. މީގެ ބިލިއަން އަހަރުއްސުރެން ދުނިޔޭގެ އެނބުރުން ދަނީ މަޑުމަޑުން ލަސްވަމުންނެވެ. މި ލަސްވުމުގެ މައިގަނޑު ސަބަބަކީ ހަނދުގެ ގްރެވިޓީ އަށް ދުނިޔެ ދަމާ ދެމުމެވެ. އެހެންކަމުން ދުނިޔެ އެނބުރުމުގެ ސްޕީޑަށް މަޑުޖެހުމެއް އަންނަނީއެވެ.
މި ބަދަލުތައް ސައިންސްވެރިންނަށް ދެނެގަނެވެނީ ޒަމާނީ އާލާތްތައް ބޭނުންކޮށްގެން އިތުރު ޞައްޙަކަމާއެކު މިންކޮށް ބެލުމުންނެވެ. އެމީހުންނަށް ހޯދިފައިވާ ގޮތުގައި ދުނިޔޭގެ އެނބުރުން މަޑުމަޑުން ގާތްގަނޑަކަށް 1.8 މިލިސެކަންޑް ގަރުނަކު ލަސްވަމުން އާދެއެވެ. މިއީ ކުޑަ ކަމެއް ކަމުގައި ހީވިޔަސް، ދިގު މުއްދަތަކަށް މިކަމުގެ ސަބަބުން ބޮޑެތި އަސަރުތަކެއް ކޮށްފާނެ އެވެ. މިސާލަކަށް އިރުގެ އަލިކަމާއި ހޫނު ބެހިފައިވާ ގޮތަށް ބަދަލު އައިސް ދުނިޔޭގެ މޫސުމަށް އަސަރުކޮށް، ރޭގަނޑު އުޑުމަތީން ފެންނަ ތަރިތަކުގެ މަޤާމަށް ވެސް ބަދަލު އަތުވެދާނެ އެވެ.
ހަނދުގެ ގްރެވިޓޭޝަނަލް ދެމުމުގެ އިތުރުން އެހެން ބައެއް ކަންތަކުގެ ސަބަބުން ވެސް ދުނިޔެ އެނބުރޭ ސްޕީޑަށް ކުރު މުއްދަތެއްގައި އަސަރު ކޮށްފާނެ އެވެ. ދުނިޔޭގެ މެދުތެރޭގައިވާ ވިރިކެކޭ ދަނގަޑުގެ ހަރަކާތްތަކާއި، ކަނޑުގެ އޮއިވަރާއި ވަޔާއި، ޖައްވުގައި ދައުރުކުރާ ހިލަތަކާއި ހިރަފުސް ފަދަ އެއްޗެހީން އަންނަ ބަދަލުތަކަކީވެސް މި ޕްލެނެޓްގެ އެނބުރުމަށް އަސަރު ކުރުވާފާނެ ކަންކަމެވެ. ސެއިސްމިކް އެކްޓިވިޓީ ނުވަތަ ބިންހެލުން ތަކުގެ ސަބަބުން ވެސް ދުނިޔެ އެނބުރޭ ސްޕީޑަށް ކުދިކުދި ބަދަލުތައް އަތުވެދާނެ އެވެ.
މީގެ އިތުރުން ދުނިޔެ އެނބުރޭ ސްޕީޑް މޫސުމީ ގޮތުން ތަފާތުތަކުން ވެސް ބަދަލު އާދެއެވެ. އެއީ އެކިދުވަސްވަރު ދުނިޔެއާއި އިރާ ދެމެދު ހުންނަ ދުރު މިނަށް ބަދަލު އަންނަމުންދާތީ އެވެ. ދުނިޔެ ދަތުރުކުރާއިރު އިރާ ކައިރިން ނުވަތަ ދުރުން ދަތުރުކުރާއިރު އޭގެ ބަރުދަން އެކި ދިމާއަށް ބެހިގެންދާ ގޮތަށް ބަދަލުވެ، އެނބުރޭ ސްޕީޑަށް ކުޑަ ބަދަލެއް އާދެއެވެ.
ދުވާލެއްގެ ދިގުމިނުގައި އެންމެ 18 ގަޑިއިރު ހުރި ޒަމާނެއްވެސް އައިސްފައިވެއެވެ. އެދުވަސްވަރު ހަނދު ހުރީ ދުނިޔެއާ މިހާރަށް ވުރެ 27،000 މޭލު ކައިރީގައެވެ.
ޚުލާޞާކޮށް ބުނާނަމަ، ދުނިޔޭގެ އެނބުރުން ދާދި އެއްވަރެއްގައި ހުންނަހެން ހީވިޔަސް، ކުދިކުދި އެކި ކަންތައްތަކުގެ ސަބަބުން ދުނިޔޭގެ އެނބުރުމަށް ކުދިކުދި ބަދަލުތަކެއް އަންނަމުން ދެއެވެ.
